Një 22-vjeçar që transportonte kokainë me makinë në autostradën Tiranë-Durrës, është arrestuar nga policia e kryeqytetit gjatë një aksioni të koduar “Trekëndëshi”.
I arrestuari është Behar Sorra, 22 vjeç. Uniformat blu kishin informacion për makinën që transportonte kokainë dhe ndërhynë për ta arrestuar në zonën e Vorës.
Gjatë kontrollit në makinën tip Benz, në sediljen e pasme, brenda një kutie, policia gjeti dhe sekuestroi 564 gram kokainë.
Kjo lëndë narkotike, sipas hetimeve, rezulton se do të shpërndahej dhe shitej në 3 zona të Tiranës; Yzberisht, Kashar dhe Ali Demi.
22-vjeçari, i arrestuar në flagrancë, akuzohet për prodhim dhe shitje të narkotikëve. Ndërkohë që blutë vijojne hetimet për të identifikuar persona të tjerë të cilët mund të jenë të përfshirë në këtë veprimtari kriminale.
