Zjarri te Arlis Sh.P.K, dyshohet se nisi tek dyqani Big Market
TIRANË- Një zjarr masiv përfshiu një pallat në kompleksin ‘Arlis’ pranë QSUT në Tiranë. Dyshohet se zjarri ka nisur tek dyqani i “Big Market”, i cili ndodhej në katin e parë të pallatit.
Flakët kanë nisur nga kati i parë dhe më pas janë përhapur me shpejtësi në të gjithë pallatin, ku si pasojë u shkrumbua i gjithi.
Në vijim të situatës së krijuar nga zjarri në një kompleks banimi në kryeqytet, janë angazhuar dhjetëra mjete zjarrfikëse dhe personel në terren. Fatmirësisht, nuk raportohen persona të lënduar si pasojë e zjarrit.
Bashkia Tiranë ka operuar me kapacitete të plota, si në mjete ashtu edhe në personel. Në ndihmë janë bashkuar edhe Bashkia Kamëz me dy mjete zjarrfikëse dhe 10 efektivë, si dhe Bashkia Vorë me dy mjete dhe 10 efektivë.
Gjithashtu, Forcat e Armatosura janë angazhuar me katër mjete zjarrfikëse, 26 efektivë dhe dy helikopter Cougar. UKT ka mbështetur operacionin me tre autobote uji.
Strukturat përkatëse janë në gatishmëri të plotë dhe po ndjekin situatën në mënyrë të vazhdueshme deri në normalizimin e saj të plotë.