Dy objekte të projektit “Durrës Marina” kanë pësuar ulje të strukturës deri në 28 centimetra, sipas një verifikimi të kryer nga autoritetet shtetërore pas raportimeve publike mbi sigurinë dhe qëndrueshmërinë e kompleksit, duke nxitur kërkesën për ndërhyrje të menjëhershme teknike.
Në një deklaratë zyrtare, Inspektorati Kombëtar për Mbrojtjen e Territorit tha se inspektimi ndërmor “në përgjigje të raportimeve të publikuara javët e fundit në media mbi problematika që lidhen me qëndrueshmërinë dhe sigurinë e dy prej objekteve të projektit zhvillimor ‘Durrës Marina’”.
Sipas raportit topografik të hartuar nga Instituti i Ndërtimit, “Objekti 02” ka “pësuar ulje prej 28 cm”, ndërsa “Objekti 04” ka “pësuar ulje prej 18 cm”. Të dy godinat ndodhen në zonat e menaxhimit A02 dhe A04 të projektit dhe janë “aktualisht në fazën ndërtimore të sistemimeve të jashtme”.
IKMT bëri të ditur se i është drejtuar zyrtarisht kompanisë zbatuese duke kërkuar “marrjen e menjëhershme të masave për realizimin e projekt-përforcimeve të nevojshme teknike, të cilat garantojnë qëndrueshmërinë e strukturave”.
Në grupin e inspektimit morën pjesë përfaqësues të IKMT-së, Agjencia e Zhvillimit të Territorit, IMT-së së Bashkisë Durrës dhe specialistë të Institutit të Ndërtimit. Sipas deklaratës, projekti i përforcimeve duhet të marrë miratimin e autoriteteve përgjegjëse për respektimin e kushteve teknike të ndërtimit përpara nisjes së zbatimit në terren.
“Durrës Marina” është një nga projektet e mëdha që qeveria i ka dhënë statusin strategjik dhe që po zhvillohet në bregdetin e Durrës brenda zonës së Portit i cili do të zhvendoset në vazhdim në Porto Romano. Projekti po zhvillohet nga Eagle Hills në partneritet me kompaninë publike shqiptare Albanian Seaports Development Company. Projekti parashikon ndërtimin e një marine moderne jahtesh, rezidencash dhe hapësirash shërbimi në zonën e ish-portit industrial të qytetit.
