Vrasje me armë zjarri në Tepelenë, viktimë një shtetas italian. Ngjarja ka ndodhur në zonën e Salarisë, ku italiani udhëtonte me automjet bashkë me disa persona të tjerë.
Sipas dëshmisë së shoferit, një person u doli përpara makinës dhe ngriti dorën për ta ndaluar, moment në të cilin autori hapi zjarr duke goditur shtetasin italian.
Gazmend Braçe është personi i dyshuar që po kërkohet nga policia. Ndërsa janë ngritur postoblloqe në disa rrugë.
Njoftimi i Policisë:
Tepelenë/Informacion paraprak
Rreth orës 00:30, në fshatin Salari, në vendin e quajtur “Dilan”, në rrugë është gjetur pa shenja jete shtetasi italian E. S., 44 vjeç, banues në Tiranë, i cili dyshohet se është vrarë me armë zjarri.
Shërbimet e Policisë, me marrjen e njoftimit, shkuan menjëherë në vendin e ngjarjes.
Është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorit/ëve.
Ndërkohë, shërbimet e Policisë, në bashkëpunim me Drejtorinë Vendore të Policisë Fier dhe Vlorë, po ushtrojnë kontrolle në zonë dhe ambiente të ndryshme, për kapjen e autorit/ëve.