Vrasja e Viktor Bardhit, policia kontrolle familjes Reçi
MIRDITË – Kanë kaluar disa ditë nga ekzekutimi i 65-vjeçarit Viktor Bardhi në Mirditë, por ende nuk ka një autor të identifikuar apo një pistë konkrete që të çojë në zbardhjen e plotë të atentatit.
Në kuadër të hetimeve, me vendim të Gjykatës së Lezhës janë autorizuar kontrolle në pesë banesa, ku dyshohet se mund të gjenden prova apo të dhëna që mund të ndihmojnë në identifikimin e autorëve. Banesat u përkasin pjesëtarëve të familjes Reçi, si dhe personave të afërt apo të njohur me ta.
Hetuesit po fokusohen veçanërisht te pista e hakmarrjes, ndërsa po verifikohen edhe konfliktet e mëparshme mes familjeve Bardhi dhe Reçi.
Viktor Bardhi u gjet i vrarë brenda automjetit të tij mëngjesin e 3 shtatorit. 65-vjeçari ishte nisur për në punë kur autorët dyshohet se i zunë pritë dhe hapën zjarr ndaj tij. Automjeti tip “Mercedes-Benz” u qëllua me breshëri plumbash dhe më pas përfundoi i përplasur me një bordurë.
Sipas hetimeve, automjeti që dyshohet se është përdorur nga autorët e atentatit ishte marrë me qira në Kosovë, ndërsa policia po punon për të rindërtuar lëvizjet e tij para dhe pas krimit.
Një nga pistat kryesore lidhet me një konflikt të vjetër mes dy familjeve. Viktor Bardhi dyshohet se mund të jetë vrarë për motive hakmarrjeje, pasi më herët viktima të lidhura me familjen e tij kanë qenë vëllai i tij, Martin Bardhi, dhe nipi Kristian Marku.
Zanafilla e konfliktit dyshohet se daton më 26 maj 2023, kur Saimir Reçi, nipi i Kastriot Reçit, i ekzekutuar në vitin 2020, pati një konflikt verbal me Enrik Bardhin, djalin e Viktor Bardhit. Shkak i debatit dyshohet se ishte bërë një parakalim me automjet në rrugën kryesore të qytetit.
Përplasja verbale më pas degjeneroi në konflikt fizik. Pas sherrit, Enrik Bardhi shkoi në banesë dhe mori një armë automatike, ndërsa bashkë me të u largua edhe Martin Bardhi.
Të dy dyshohet se i zunë pritë Saimir Reçit në dalje të Rrëshenit dhe qëlluan drejt automjetit të tij. Reçi nuk pësoi dëmtime, pasi makina ishte e blinduar. Si pasojë e të shtënave, ai humbi kontrollin e automjetit, doli nga rruga dhe u përplas.
Hetuesit po verifikojnë nëse kjo histori konflikti dhe hakmarrjeje lidhet drejtpërdrejt me ekzekutimin e Viktor Bardhit. Kontrollet në pesë banesa pritet të ndihmojnë në sigurimin e provave të reja dhe në përcaktimin e autorëve të atentatit.
