Vlorë/Furgoni del nga rruga: 1 viktimë, 4 të plagosur
Aksident tragjik në Vlorë, humb jetën një 52-vjeçar! Katër të plagosur pas daljes nga rruga të furgonit me punëtorë
VLORË – Një aksident i rëndë rrugor ka ndodhur mëngjesin e sotëm në aksin Vlorë–Llogara, në zonën e njohur si Fushë Dukat, ku një person ka humbur jetën dhe katër të tjerë kanë mbetur të plagosur.
Sipas informacionit paraprak, një furgon që transportonte punonjës ndërtimi, me drejtues shtetasin S. R., 22 vjeç, dyshohet se ka humbur kontrollin dhe ka dalë nga rruga, duke u përplasur me një bordurë betoni.
Përplasja ka qenë e fortë, duke shkaktuar dëmtime të mëdha në mjet. Për nxjerrjen e të plagosurve, të cilët mbetën të bllokuar brenda furgonit, u desh ndërhyrja e forcave zjarrfikëse.
Si pasojë e aksidentit, ka humbur jetën në vendngjarje pasagjeri Ilir Haka, 52 vjeç. Të plagosur kanë mbetur drejtuesi i mjetit, Sako Rexha, 22 vjeç, si edhe Saimir Haka, 22 vjeç, Qazim Haka, 44 vjeç dhe një pasagjer tjetër. Të gjithë janë transportuar në spital, ku po marrin trajtim mjekësor.
Grupi hetimor ndodhet në vendin e ngjarjes dhe po punon për të zbardhur rrethanat dhe shkaqet e aksidentit.
Ngjarja i shtohet bilancit të rëndë të aksidenteve rrugore gjatë kësaj vere, ndërsa autoritetet vijojnë apelin për respektimin e rregullave të qarkullimit dhe drejtimin me kujdes të mjeteve.
