Sektori i ndërtimit është kthyer vitet e fundit në një nga kanalet më të dyshuara për pastrimin e parave në Shqipëri. Ndërtimi i pallateve dhe kullave, veçanërisht në zonat më të shtrenjta urbane, po shoqërohet me dyshime të forta se po përdoret për të legalizuar shuma të mëdha parash me burim të paqartë.
Një praktikë alarmante lidhet me mënyrën e shitjes së apartamenteve. Sipas burimeve dhe realitetit të tregut, një pjesë e konsiderueshme e apartamenteve shiten cash, jashtë sistemit bankar, madje që në fazën fillestare të ndërtimit. Ka raste kur blerjet kryhen që “në gropë”, me pagesa të bëra me para në dorë, pa kontrata të qarta financiare dhe pa gjurmë të verifikueshme të origjinës së fondeve.
Kjo mënyrë operimi jo vetëm që shmang kontrollin fiskal, por krijon terren ideal për pastrimin e parave, duke deformuar tregun e pasurive të paluajtshme dhe duke rritur artificialisht çmimet e banesave. Ndërkohë, qytetarët dhe blerësit e ndershëm përballen me kosto gjithnjë e më të larta dhe mungesë transparence.
Me emërimin e Klod Brahos si drejtues i ri i Strukturës së Posaçme kundër Korrupsionit dhe Krimit të Organizuar (SPAK), pritshmëritë janë që këto skema të vihen nën hetim të thelluar. SPAK pritet të fokusohet në gjurmimin e transaksioneve financiare, burimin e kapitalit që financon ndërtimet dhe rolin e individëve apo grupeve të përfshira në këtë mekanizëm.
Vendosja në sitë e pastrimit të parave përmes pallateve dhe kullave shihet si një test i rëndësishëm për drejtësinë e re. Hetimi i këtyre praktikave do të ishte një hap vendimtar drejt transparencës, forcimit të shtetit ligjor dhe rikthimit të besimit të publikut te institucionet e drejtësisë.
