Një ngjarje e rëndë ka tronditur qytetin e Peruxhias në Itali dhe komunitetin shqiptar atje. Një 23-vjeçar me origjinë shqiptare, i identifikuar si Hekuran Cumani nga Fabriano (Ancona), është vrarë me thikë në orët e para të së shtunës në një nga parkingjet pranë Universitetit të Peruxhias.
Sipas Prokurorisë së Peruxhias, ngjarja po hetohet si vrasje me dashje, e cila dyshohet të ketë ndodhur pas një grindjeje për arsye të parëndësishme.
I riu u godit me thikë në fyt dhe në gjoks, duke marrë plagë fatale. Ekipet e emergjencës mbërritën menjëherë në vendngjarje, por nuk arritën ta shpëtojnë – ai kishte ndërruar jetë në vend.
Grindje jashtë një lokali, më pas përplasje fatale
Mësohet se Hekurani kishte shkuar në Peruxhia për t’u argëtuar me shokët. Konflikti ka nisur jashtë lokalit “110 Caffè”, pranë Departamentit të Matematikës dhe Shkencave Kompjuterike të Universitetit, ku grupi i tij është përfshirë në një debat me disa të rinj të tjerë. Sherri verbal është përshkallëzuar në përleshje fizike, dhe një prej personave – ende i paidentifikuar – e ka goditur me thikë duke i marrë jetën.
Miqtë: “I qetë, i dashur dhe i dhënë pas palestrës”
Miqtë e të ndjerit e përshkruajnë atë si një djalë shembullor.
“E donte palestrën dhe jetën e shëndetshme. Ishte i dashur me familjen dhe kafshët. Nuk e meritonte këtë fund,” – ka thënë një prej shokëve të tij për mediat lokale.
Policia ka marrë në pyetje të gjithë personat e pranishëm gjatë incidentit, ndërsa kamerat e sigurisë së zonës po analizohen për të identifikuar autorin e vrasjes. Kryetari i bashkisë së Peruxhias dhe këshillat përkatëse kanë shprehur ngushëllimet për familjen e të riut:
“Është e vështirë të pranosh që një jetë kaq e re të ndërpritet në mënyrë kaq të dhunshme. Dhimbja e këtyre orëve shtrihet në të gjithë qytetin. Peruxhia qëndron pranë familjes dhe miqve të tij.”
