Të preferuarit e shtetit dhe të SPAK-ut, “Salillari” dhe “2T” marrin tenderat mbi 60 mln euro të Bypass-it të Elbasanit
Kompania “Salillari” e biznesmenit Pëllumb Salillari duket se mbetet e vetmja që arrin të bindë plotësisht institucionet shtetërore kur vjen puna te ndërtimi i rrugëve. Për këtë kompani, koncesionet dhe tenderat e mëdhenj të infrastrukturës nuk mungojnë asnjëherë. Vetëm një muaj pasi Ministria e Infrastrukturës njoftoi se “Salillari” ishte një nga kompanitë që siguroi koncesionin 35-vjeçar të rrugës Milot-Balldre me vlerë 364 milionë euro, Autoriteti Rrugor Shqiptar i ka dhënë një tjetër kontratë të majme.
Bëhet fjalë për lotin e dytë të Bypass-it të Elbasanit, një procedurë me fond limit 26 milionë euro. Ky tender nxjerr në pah sërish mekanizmat e dyshimtë të përzgjedhjes së fituesve. Ndonëse në garë shfaqën interes 16 kompani dhe bashkimi i operatorëve “PE – VLA – KU”, “BIBA X” e “XHAST SHPK” dha një ofertë plot 760 mijë euro më të lirë, ARRSH vendosi ta skualifikonte. Rruga mbeti e hapur “Salillarit”, që u shpall fitues me ofertën sa 72.1% e vlerës së tenderit.
Në të njëjtën kohë, ARRSH ka ndarë edhe lotin e parë të këtij projekti me vlerë 34.4 milionë euro. Edhe këtu fituesi nuk është një emër i njohur, pasi kontrata i kaloi kompanisë “2T”, e cila 50% është në pronësi të Artan Sakos, vëllait të kryebashkiakut socialist të Tepelenës.
Kontratat e rrugëve përballë dritëhijeve të dosjeve të SPAK-ut
Ajo që e bën më problematike këtë situatë është fakti se të dyja kompanitë përfituese po ruajnë besimin e palëkundur të shtetit, ndërkohë që janë të zhytura në hetimet e Prokurorisë së Posaçme. Ky kontrast i fortë mes tenderave që vazhdojnë të rrjedhin dhe dyshimeve për korrupsion tregon qartë sesi funksionon sistemi i prokurimeve në infrastrukturë.
“Salillari” është vënë në shënjestër të SPAK-ut pas përfitimit të rreth 170–180 milionë eurove nga buxheti i shtetit. Sipas dosjeve hetimore, ekzistojnë dyshime të forta se kompania ka siguruar kontrata rrugore përmes skemave të paracaktimit të fituesit në tavolinë, skualifikimit të paligjshëm të ofertave më të ulëta dhe manipulimit të volumeve. Rasti më flagrant është ai i Lotit 1 të Unazës së Re, ku SPAK ka dërguar në gjyq 6 zyrtarë të ARRSH-së për favorizim të hapur të kësaj kompanie. Hetimet kanë shkuar deri aty sa BKH ka bastisur zyrat e firmës dhe ka sekuestruar telefonat e pajisjet elektronike. Për më tepër, emri i Pëllumb Salillarit ka dalë edhe në dosjen voluminoze për ish-ministren Belinda Balluku, ku ai është listuar për t’u marrë në pyetje si person që ka djeni për rrethanat.
Nga ana tjetër, as kompania “2T” e Artan Sakos nuk mbetet pas. Edhe zyrat e kësaj kompanie, e cila ka qenë një nga përfitueset më të mëdha të fondeve publike, janë kontrolluar nga BKH me qëllim zbardhjen e procedurave për projektet më të mëdha në vend. Hetimet ndaj “2T” janë përqendruar specifikisht te skualifikimet e dyshimta në Lotin 2 të Unazës së Madhe të Tiranës, te fondet shtesë që u alokuan për Lotin 3 të aksit Qukës-Qafë Plloçë pas shembjeve në terren, si dhe te kontratat e mirëmbajtjes rrugore që e lidhin emrin e Sakos me dosjen e ish-kreut të ARRSH-së, Evis Berberi.
Salillari merr koncesionin 1 miliardë euro të Milot Balldrenë
Këto raste tregojnë se në tenderat e rrugëve formula nuk ndryshon. Ndërsa SPAK-u mbush dosjet dhe sekuestron zyrava, ARRSH-ja vazhdon të mbushë llogaritë e të njëjtave kompani me miliona euro. Me sa duket, për institucionet tona, asnjë hetim për korrupsion nuk peshon më shumë sesa “besnikëria” ndaj fituesve të zakonshëm.
