Drejtoria e Përgjithshme e Tatimeve ka reaguar pas hetimeve ndaj kompanisë “Bankers Petroleum Albania Ltd”, duke bërë të ditur se aksioni ndaj kësaj kompanie erdhi si rezultat i një verifikimi të thelluar 6-mujor nga Administrata Tatimore.
Sipas deklaratës zyrtare, janë mbledhur prova që ngrenë dyshime të forta se kompania ka krijuar skema mashtruese përmes fryrjes fiktive të shpenzimeve, me qëllim shmangien e pagesës së tatimfitimit dhe përfitimin e padrejtë të rimbursimit të TVSH-së.
“Administrata Tatimore është e angazhuar në mënyrë të pandërprerë në luftën kundër informalitetit dhe skemave mashtruese që dëmtojnë të ardhurat publike dhe konkurrencën e ndershme,” thuhet në njoftim.
Aksioni i ndërmarrë më 2 korrik në bashkëpunim me Policinë dhe Prokurorinë e Fierit u zhvillua në zyrat qendrore të Bankers në zonën e Marinzës, pas hetimeve të kryera nga Drejtoria e Hetimit Tatimor.
Sipas Tatimeve, skemat mashtruese janë realizuar përmes bashkëpunimit me individë dhe shoqëri të tjera kontraktuese, brenda dhe jashtë vendit. Gjithashtu, punonjës të kompanisë dyshohet se kanë falsifikuar dokumente dhe kanë kryer operacione financiare të dyshimta.
“Objektivi ynë është garantimi i barazisë përpara ligjit, ku gjithsecili paguan atë që i takon. Ftojmë të gjitha subjektet të respektojnë detyrimet ligjore për të ndërtuar një klimë biznesi të shëndetshme dhe transparente,” përfundon deklarata e Drejtorisë së Përgjithshme të Tatimeve. /skyweb.al
