Tarifat e larta të pasaportave dhe ID-ve i sjellin IDENTITEK-ut miliona euro fitime
IDENTITEK, kompania shtetërore që prodhon dhe shpërndan dokumentet biometrike në Shqipëri, ka realizuar fitime të konsiderueshme nga një shërbim publik ku qytetarët nuk kanë alternativë tjetër ofruesi.
Shoqëria u krijua në vitin 2023 dhe është 100% në pronësi të shtetit shqiptar, përmes Ministrisë së Brendshme, pas përfundimit të koncesionit të mëparshëm për prodhimin e pasaportave dhe kartave të identitetit.
Sipas bilancit financiar të depozituar në Qendrën Kombëtare të Biznesit, të cilit i është referuar Kliknews.al, gjatë vitit 2025 IDENTITEK realizoi rreth 3.5 miliardë lekë të ardhura, ose mbi 37 milionë euro.
Nga ky aktivitet, fitimi bruto arriti në rreth 2.4 miliardë lekë, duke përfaqësuar një marzh bruto prej rreth 68.2%.
Pas zbritjes së taksave dhe shpenzimeve të tjera, kompania shtetërore rezulton me një fitim neto prej rreth 1.5 miliardë lekësh, ose afërsisht 16.4 milionë euro.
Rezultatet financiare bëhen veçanërisht të rëndësishme për shkak të natyrës së aktivitetit të IDENTITEK. Pajisja me pasaportë dhe kartë identiteti është një shërbim i detyrueshëm shtetëror dhe qytetarët nuk mund ta blejnë atë nga një operator tjetër.
Ndërkohë, çmimet që paguajnë shqiptarët kanë mbetur të pandryshuara, pavarësisht se kostot e kompanisë për prodhimin e dokumenteve janë reduktuar ndjeshëm.
Sipas bilancit, gjatë vitit 2025 të ardhurat e IDENTITEK ranë me 3.8% krahasuar me një vit më parë, por fitimi neto u rrit me 10.2%.
Një nga arsyet kryesore është ulja e kostos së mallrave të shitura, ku përfshihen edhe kostot që lidhen me prodhimin e dokumenteve biometrike. Kjo kategori shpenzimesh rezulton rreth 32.2% më e ulët.
Megjithatë, ulja e kostove nuk është reflektuar në tarifat që paguajnë qytetarët.
Aktualisht një pasaportë biometrike kushton rreth 80 euro, ndërsa karta e identitetit rreth 17 euro.
Krahasimi me Kosovën tregon një diferencë të konsiderueshme. Atje pasaporta biometrike kushton 30 euro për të rriturit, 20 euro për fëmijët dhe 15 euro për pensionistët, ndërsa letërnjoftimi kushton 10 euro.
Në Shqipëri nuk aplikohet një tarifë më e ulët për pasaportën e fëmijëve, duke bërë që një familje me disa anëtarë të përballojë një faturë të konsiderueshme sa herë duhet të rinovojë dokumentet.
Bilanci i IDENTITEK tregon kështu se tarifat e paguara nga qytetarët po gjenerojnë miliona euro fitim çdo vit për një kompani 100% shtetërore, në një treg ku konsumatori nuk ka mundësi zgjedhjeje.
Rënia e kostove të prodhimit dhe rritja e fitimit neto ngre në këtë mënyrë edhe çështjen nëse tarifat e pasaportave dhe kartave të identitetit duhet të rishikohen, duke qenë se bëhet fjalë për një shërbim publik monopol të ofruar nga vetë shteti.
