Spitalet private nën lupën e Konkurrencës, Kuvendi kërkon kontroll për çmimet e larta
Kuvendi i ka kërkuar Autoritetit të Konkurrencës të monitorojë tregun e spitaleve private, një nga sektorët ku qytetarët përballen shpesh me fatura të larta dhe mungesë transparence mbi tarifat.
Në rezolutën për vitin 2026, Autoritetit i kërkohet të analizojë nëse në tregun e shërbimeve spitalore private ka elemente të abuzimit me pozitën dominuese, shkruan InfoNews.
Me fjalë të thjeshta, Kuvendi kërkon të shihet nëse operatorë të caktuar kanë fuqi të madhe në treg dhe nëse kjo fuqi po përdoret për të vendosur çmime të larta apo për të kufizuar ofertën.
Një tjetër pikë e rëndësishme është transparenca e tarifave.
Autoriteti duhet të verifikojë nëse pagesat dhe shërbimet janë të gjurmueshme, nëse tregu është mjaftueshëm i formalizuar dhe nëse qytetarët kanë informacion të qartë për çmimet që paguajnë.
Kuvendi sic meson InfonNews kërkon gjithashtu të shihet nëse kontrolli aktual është i mjaftueshëm për të parandaluar *çmimet e tepruara* dhe kufizimin e shërbimeve.
Kjo e vendos tregun e spitaleve private nën presion më të madh institucional, në një kohë kur kostot e shëndetësisë private janë kthyer në shqetësim për shumë familje.
Në thelb, kërkesa e Kuvendit është që Autoriteti i Konkurrencës të japë një përgjigje të qartë: a funksionon realisht konkurrenca në spitalet private, apo qytetarët po paguajnë më shumë nga mungesa e saj?