ELBASAN- Një ngjarje e pazakontë ka ndodhur në qytetin e Elbasanit, ku një 37-vjeçar dyshohet se ka gëlltitur një sasi lënde narkotike, për t’i shpëtuar kontrollit të policisë. Ngjarja ka ndodhur në aksin rrugor Bradashesh–Elbasan, ku një drejtues mjeti me xhama të zinj nuk iu bind urdhrit të policisë për të paraqitur dokumentacionin dhe menjëherë pas shoqërimit në komisariat, ai ka shfaqur probleme shëndetësore.
Sipas njoftimit të Drejtorisë Vendore të Policisë Elbasan, patrullat e Qarkullimit Rrugor kanë ndaluar një automjet të dyshimtë, të drejtuar nga shtetasi E. M., 37 vjeç. Edhe pse ai ndaloi automjetin, refuzoi t’u dorëzonte dokumentacionin zyrtarëve të policisë. Si pasojë, ai u shoqërua në Komisariatin e Policisë për verifikime të mëtejshme.
Gjatë procedurave në ambientet e policisë, E. M. ka shfaqur probleme shëndetësore dhe është dërguar menjëherë në spital për ndihmë mjekësore. Burime zyrtare bëjnë me dije se paraprakisht dyshohet se 37-vjeçari ka gëlltitur një sasi lënde të dyshuar narkotike, me qëllim shmangien e përgjegjësisë penale.
Aktualisht, ai ndodhet nën kujdesin e mjekëve dhe është jashtë rrezikut për jetën.