Këshilli i Lartë Gjyqësor, pas mbledhjes urgjente me 260 gjyqtarë, ka ngritur një grup pune dhe ka miratuar planin e masave për sigurinë në gjykata. Plani vjen pas alarmit që ngritën gjyqtarët për sigurinë në gjykata, pas vrasjes në sallën e gjyqit të gjyqtarit të Apelit, Astrit Kalaja. Në një deklaratë të ndarë për mediat, KLGJ thotë se do të analizojnë masat e marra dhe kërkesat e drejtuara KLGJ-së nga secila gjykatë mbi sigurinë përgjatë viteve 2023-2025. Po ashtu, KLGJ thotë se do të analizojnë kushtet ekzistuese të sigurisë në gjykata dhe më pas do të adresojnë ndryshimet ligjore dhe nënligjore për marrjen e masave për garantimin e sigurisë në gjykata për gjyqtarët, personelin gjyqësor dhe çdo përdorues të gjykatës.
Plani i hartuar nga KLGJ parashikon edhe miratimin e protokolleve dhe procedurave standarde të sigurisë për secilën gjykatë. Arrestimi i punonjësit të sigurisë në gjykatën e Apelit, pas vrasjes së gjyqtarit Kalaja, pasi nuk lëvizi për të kontrolluar autorin Elvis Shkambi për armën, ka bërë që KLGJ të shtojë në shtojë në plan edhe një pikë ku thekson se për çdo gjykatë do të garantojë punonjës sigurie të trajnuar, ose policë të Policisë së Shtetit.
Më tej, KLGJ thotë se do të kërkojnë ndihmë për ndërtimin e 8 godinave të reja të gjykatave të shkallës së parë në rrethet gjyqësore, si dhe ndërtimit të godinave të reja për Gjykatën e Apelit të Juridiksionit të Përgjithshëm dhe Gjykatën e Shkallës së Parë të Juridiksionit të Përgjithshëm Tiranë. Sipas planit të hartuar nga KLGJ, parashikohet që t’i kërkohet Ministrisë së Drejtësisë që godinat ekzistuese të gjykatave, si edhe ato që do të ndërtohen, të kalojnë në pronësi të KLGJ në kuadër të pavarësisë institucionale.
