Si u shkel leja e pallatit nga Mirson 2A Sh.p.k! Punimet u nisën nga Mirsim Jella dhe u vijuan nga Adriatik Shtëmbari
Tre kate të një objekti prej 12 katesh në Tiranë, janë konfiskuar pasi është konstatuar shkelja e lejes së miratuar. Godina ndodhet në rrugën ‘Llukë Kaçaj’, aktualisht i pabanuar pasi punimet ende nuk kanë përfunduar.
Nga aksioni i përbashkët mes Komisariatit nr. 4 dhe Inspektoratit të Mbrojtjes së Territorit (IMT) u konstatua se objekti ishte vënë në shfrytëzim pa certifikatë përdorimi.
Ndërtimi është nisur fillimisht nga ndërtuesi Mirsim Jella, i cili sipas burimeve nuk ka mundur ta përfundojë për çështje financash, dhe ka vijuar nga Adriatik Shtëmbari.
Konkretisht rezulton se në kundërshtim me lejen e miratuar janë ndërtuar rreth 2550 m² shtesë. Ky tejkalim përbën më shumë se 20% të sipërfaqes së përgjithshme të projektit të miratuar duke shkelur kufirin ligjor të përcaktuar nga Akti Normativ nr. 8, datë 01.10.2025:
1. Tek të gjitha objektet, në të cilat konstatohen punime pa leje apo në tejkalim të lejes mbi masën 2% të sipërfaqes totale ndërtimore mbi dhe nën tokë, dhe për shkak të qëndrueshmërisë së objektit është e pamundur prishja e tij, konfiskohen për interes publik apo strehim social punimet e kryera pa leje për qëllime fitimi, ose një sipërfaqe ekuivalente me to, brenda objektit, e cila të jetë hapësirë e shfrytëzueshme.
2. Tek të gjitha objektet, në të cilat konstatohen punime pa leje apo në tejkalim të lejes për qëllime fitimi, mbi masën 10% të sipërfaqes totale ndërtimore mbi dhe nën tokë, konfiskohet, për interes publik apo strehim social, i gjithë objekti apo vendoset prishja e plotë e tij nga organet përgjegjëse.
3. Konfiskimi kryhet me propozim të IKMT-së dhe me miratim të KKTU-së.
4. Rregullat, procedurat dhe mënyrat përkatëse për prishjen apo konfiskimin për interes publik apo strehim social miratohen me vendim të Këshillit të Ministrave.”.
Ky akt normativ është botuar në fletoren zyrtare në dhjetorin e kaluar në kuadër të nismës së qeverisë për goditjen e ndërtimeve pa leje. Referuar këtyre ndryshimeve ligjore, kwto kate tw konfiskuara do të përdoren për interes publik apo strehim social.
