Shkatërrohet Kanioni i Erzenit
Një nga atraksionet më të veçanta natyrore pranë Tiranës, Gryka e Skoranës, e njohur ndryshe si Kanioni i Erzenit, po përballet me një degradim të rëndë që rrezikon ta nxjerrë përfundimisht jashtë hartës turistike dhe natyrore të kryeqytetit.
Alarmi është ngritur nga eksploratori dhe fotografi i njohur, Fation Plaku, i cili publikoi në rrjetet sociale pamje dhe dëshmi nga zona, duke e cilësuar situatën si një “masakër mjedisore” që ka varrosur një nga perlat më të bukura natyrore të Tiranës.
Sipas tij, ndërhyrjet e firmave ndërtuese dhe depozitimi i inerteve kanë ndryshuar rrënjësisht peizazhin e kanionit, duke dëmtuar rëndë ekosistemin dhe duke e bërë zonën thuajse të pakalueshme për vizitorët.
Për shumë vite, Kanioni i Erzenit ka qenë një prej destinacioneve më të frekuentuara nga të apasionuarit pas natyrës, ecjeve malore dhe aventurave në ujë. Ujërat e kristalta të lumit Erzen, shkëmbinjtë monumentalë dhe peizazhi i veçantë e kishin kthyer zonën në një pikë referimi për turizmin e fundjavës pranë Tiranës.
Por sipas dëshmive të publikuara së fundmi, kjo pasuri natyrore duket se po pëson të njëjtin fat si Kanioni i Brarit, një tjetër destinacion i njohur i kryeqytetit që u degradua vite më parë pas depozitimit të inerteve nga punimet e Rrugës së Arbrit.
Nëse konfirmohen pretendimet e ngritura nga banorët dhe vizitorët e zonës, Tirana rrezikon të humbasë dy nga asetet e saj më të rëndësishme natyrore në harkun e vetëm pak viteve.
Ekspertët e mjedisit kanë paralajmëruar vazhdimisht se hedhja e pakontrolluar e inerteve në shtretërit e lumenjve, grykat shkëmbore dhe zonat me vlera natyrore jo vetëm që dëmton biodiversitetin, por sjell pasoja afatgjata për zhvillimin e turizmit dhe ekonomisë lokale.
Ndërkohë, deri tani nuk ka një reagim zyrtar nga institucionet përgjegjëse mbi ndërhyrjet e raportuara në Grykën e Skoranës dhe ligjshmërinë e tyre. Mbetet e paqartë nëse është kryer një vlerësim mjedisor për punimet në zonë, si dhe nëse janë respektuar kushtet për mbrojtjen e habitatit natyror.
Rasti ngre edhe një herë pyetjen se sa e mbrojtur është trashëgimia natyrore e Tiranës përballë presionit të zhvillimit urban dhe projekteve infrastrukturore. Për shumë qytetarë, humbja e vendeve si Kanioni i Brarit dhe Kanioni i Erzenit nuk përfaqëson thjesht zhdukjen e disa destinacioneve turistike, por humbjen e një pjese të identitetit natyror të kryeqytetit. /ekofin.al
