Një grup aktivistësh të shoqërisë civile dhe qytetarësh po organizojnë një protestë përpara Ministrisë së Shëndetësisë, me moton “Ky nuk është më tetor rozë, ky është tetor në zi”, për të denoncuar mungesën e barnave antikancerogjene, keqmenaxhimin në sistemin shëndetësor dhe neglizhencën shtetërore ndaj pacienteve me kancer.
Në thirrjen publike të shpërndarë sot, organizatorët pyesin me tone të forta:
“A do të vazhdojmë të veshim fjongo rozë ndërsa gratë vdesin në korridoret e spitaleve publike? A do të lejojmë që jeta e nënave, motrave dhe vajzave tona të matet me donacione dhe jo me përgjegjësi shtetërore?”
Aktivistët e quajnë situatën në Onkologjik një “katastrofë humane” dhe theksojnë se shëndeti nuk është luks, por e drejtë bazë njerëzore. Ata u referohen të dhënave të Kontrollit të Lartë të Shtetit (shtator 2025), sipas të cilave:
• ka mungesa të rënda në furnizimin me ilaçe, edhe në rastet urgjente;
• në spitale gjenden flakonë të skaduar;
• mungojnë pajisje për përgatitjen e barnave citostatike, çka rrezikon jetën e pacientëve;
• 46% e barnave antitumorale të miratuara nuk janë importuar;
• dhe disa barna thelbësore, si Actinomycin D, sigurohen vetëm përmes donacioneve.
“Në Shqipëri, jeta e pacientëve me kancer varet nga ndihmat, jo nga shteti,” – thuhet në deklaratën e tyre, ku përmendet edhe puna e gazetarëve investigativë, si Osman Stafa, që kanë dokumentuar ndër vite mungesat, abuzimet dhe shpërdorimet në sektorin onkologjik.
Sipas organizatorëve, kjo protestë nuk ka ngjyrime politike, por është një thirrje për drejtësi, llogaridhënie dhe garantimin e të drejtës për jetë.
Ata paralajmërojnë se nuk do të ndalen “derisa të mbarojë epoka e justifikimeve dhe të nisë epoka e përgjegjësisë.”