Po në Shqipëri? Plas skandali në Greqi, një në çdo katër karburante vjedh shoferët
Një skandal i madh ka përfshirë tregun e karburanteve në Greqi, ku një në katër pika karburanti rezulton se u jep shoferëve më pak karburant nga sa paguajnë.
Sipas një studimi të Universitetit Teknik Kombëtar të Athinës, fenomeni i vjedhjes në pompë u kushton konsumatorëve grekë rreth 400 milionë euro në vit.
Studimi, i prezantuar nga Shoqata e Kompanive të Tregtimit të Naftës, tregon se pavarësisht kontrolleve dhe mbylljes së 92 pikave të karburantit vitin e kaluar, problemi mbetet i përhapur.
Në Atikë, 23.1% e karburanteve rezultuan me probleme në sasinë që shënon në tabelë dhe atë reale që i jepet konsumatorit, ndërsa në Selanik kjo shifër ishte 18.6%.
Sipas shoqatës, vjedhja nuk lidhet më kryesisht me kontrabandën, por me faktin që konsumatori paguan për një sasi karburanti dhe merr më pak në depozitën e makinës. Një fenomen i ngjashëm përflitet se ndodh në pika të ndryshme karburanti edhe në Shqipëri, por deri më tani nuk ka patur një verifikim zyrtar.