Plasin sheshit mesazhet e brendshme! Intrigat Pacolli-Ademi, çfarë i shkruante Valoni
Valon Lluka, ish-administratori i shoqërisë koncesionare të Aeroportit Ndërkombëtar të Vlorës, ka reaguar për herë të parë publikisht për çështjen e aksioneve të këtij projekti, duke publikuar mesazhe private dhe dokumente që sipas tij tregojnë se procesi i kalimit të aksioneve është kryer me dijeninë dhe autorizimin e Behgjet Pacollit.
Në një postim në Facebook, Lluka shkruan se pas akuzave publike ndaj tij ka vendosur të flasë “me dokumente” dhe jo me emocione. Ai thotë se ka heshtur për muaj me radhë, pasi ka besuar se e vërteta duhej të sqarohej në institucione dhe përmes dokumentacionit zyrtar.
Sipas Llukës, në maj të vitit 2022, Mabco Construction SA miratoi zyrtarisht shitjen e aksioneve të Aeroportit Ndërkombëtar të Vlorës dhe e autorizoi atë për realizimin e procesit. Ai shton se vendimi dhe autorizimi janë nënshkruar, noterizuar dhe apostiluar në Zvicër.
Më tej, Lluka thotë se në korrik 2023 është marrë një tjetër vendim për 47 për qind të aksioneve të Aeroportit Ndërkombëtar të Vlorës dhe se në të njëjtën ditë është lëshuar një prokurë e posaçme që e autorizonte të nënshkruante dokumentet dhe të kryente regjistrimet e nevojshme ligjore.
“Është me rëndësi të kuptohet një fakt shumë i thjeshtë: një kontratë shitblerjeje aksionesh nuk mund të nënshkruhet pa vendim të aksionarëve dhe pa autorizim formal të dhënë nga vetë kompania. Këto nuk janë procedura që mund të kryhen mbi bazë iniciative personale apo pa dijeninë e palëve përgjegjëse”, shkruan Lluka.
Ai pretendon se vendimet dhe autorizimet i janë përcjellë që nga viti 2022 drejtpërdrejt nga administrata e Mabco në Lugano, përmes komunikimeve zyrtare të kompanisë.
Në reagimin e tij, Lluka thekson se përtej dokumenteve zyrtare ka pasur edhe komunikim të drejtpërdrejtë për zbatimin e procesit dhe dakordimet përkatëse. Sipas tij, në raste konkrete ai ka kërkuar konfirmime të drejtpërdrejta për hapat që duheshin ndërmarrë dhe ka vepruar vetëm pas konfirmimeve të marra.
Ish-administratori i VIA-s thotë se proceset nuk janë zhvilluar në mënyrë individuale apo të fshehtë, por përmes administratës, juristëve, stafit të përfshirë në komunikime zyrtare, email-e dhe procedura institucionale të kompanisë.
Lluka ngre pyetjen se nëse e gjithë kjo paraqitet si një “skemë” personale e tij, atëherë publiku duhet të besojë se administrata, juristët, menaxhmenti i lartë, bashkëpunëtorët më të afërt dhe familjarë të ngushtë të Behgjet Pacollit nga zyra qendrore kanë qenë të përfshirë në komunikime, email-e, dokumentacion dhe noterizime pa e ditur.
“Apo e vërteta është shumë më e thjeshtë: që procesi është zhvilluar mbi bazën e vendimeve, autorizimeve dhe dokumenteve zyrtare të kompanisë”, shkruan ai.
Lluka mohon të ketë vepruar pa autorizim, duke theksuar se nuk ka nënshkruar asnjë dokument jashtë mandatit të dhënë.
“Unë nuk kam nënshkruar asnjë dokument pa autorizim. Nuk kam vepruar asnjëherë jashtë mandatit të dhënë. Kam bërë vetëm atë që dokumentet më kanë autorizuar të bëj”, deklaron ai.
Publikimi i mesazheve dhe dokumenteve vjen pas akuzave të mëparshme publike për procesin e kalimit të aksioneve në projektin e Aeroportit Ndërkombëtar të Vlorës. Lluka thotë se dokumentet e publikuara janë vetëm një pjesë e komunikimeve dhe akteve zyrtare që ekzistojnë për këtë çështje.
