Në vend të verës shishet ishin mbushur me 500 euroshe…/ Agasi dhe Beqiri ia çonin Mirlinda Karçanajt
Detaje të reja nga hetimet e Prokurorisë së Posaçme hedhin dritë mbi një nga episodet më të forta të dosjes së AKSHI-t, ku përshkruhet mënyra konkrete se si, sipas dyshimeve, janë dorëzuar paratë tek ish-drejtoresha Mirlinda Karçanaj.Hetimet e drejtuara nga prokurori Bledar Maksutaj kanë dokumentuar të paktën 200 mijë euro ryshfet, që dyshohet se janë përfituar nga Karçanaj nëpërmjet një zinxhiri personash të lidhur me strukturën e hetuar.
Në qendër të kësaj skeme dalin emrat e Ergys Agasit dhe Ermal Beqirit, të cilët sipas materialeve hetimore, përdornin një metodë të pazakontë për dorëzimin e parave: kuti shishesh vere të mbushura me kartmonedha euro në prerje 100, 200 dhe 500.
Ndërkohë Ergys Agasi konsiderohet si kreu i këtij grupi të strukturuar kriminal.
Sipas dosjes që ka parë skyweb.al, këto “kuti vere” janë përdorur në disa raste për të maskuar kalimin e shumave monetare drejt Karçanajt.Paratë nuk kalonin gjithmonë drejtpërdrejt, por përmes ndërmjetësve, ku përmenden Daniel Shima dhe Arjola Koromani, kjo e fundit e konsideruar si person i besuar i Ermal Beqirit.
Dokumenti thekson se ekzistojnë dyshime të arsyeshme se një pjesë e shumave janë kaluar fillimisht përmes Daniel Shimës, ndërsa në raste të tjera përmes Arjola Koromanit, duke krijuar një rrjet të ndërmjetëm për të shmangur gjurmimin e drejtpërdrejtë të parave.
Në këtë zinxhir, roli i Ermal Beqirit del i lidhur me organizimin dhe furnizimin e këtyre shumave, ndërsa lidhjet e tij me Ergys Agasin përmenden si pjesë e një strukture më të gjerë që, sipas hetimit, ka ndikuar në procedurat e prokurimit publik.
Po sipas materialeve hetimore, këto përfitime financiare dyshohet se janë përdorur edhe për blerje pasurish të paluajtshme, kryesisht në Tiranë dhe në zonën e Qerretit.
Një element që bie në sy në këtë dosje është përdorimi i verës si element mbulues, çka sipas hetuesve shërbente për të kamufluar transfertat e parave dhe për të shmangur dyshimet në momentin e dorëzimit.
Të gjitha këto të dhëna, sipas SPAK, lidhen me një skemë të mirëorganizuar korrupsioni, ku përmes ndërmjetësve dhe formave të maskuara janë shpërndarë përfitime financiare me qëllim favorizimin e kompanive të caktuara në tenderat e AKSHI-t.
