TIRANË – Këshilli Mbikëqyrës i Bankës së Shqipërisë ka dhënë miratimin paraprak për licencimin e Jet Bank, e cila synon të operojë si banka e parë plotësisht digjitale në Shqipëri. Megjithatë, hyrja e një subjekti të ri bankar në treg po shoqërohet me disa pikëpyetje lidhur me transparencën, kapitalizimin dhe modelin e biznesit që pritet të ndjekë.
Jet Bank është themeluar në Shqipëri në muajin shtator të këtij viti, me një kapital fillestar prej vetëm 3.5 milionë lekësh të rinj. Themeluesi dhe aksioneri i vetëm i shoqërisë është shtetasi izraelito-britanik Idan Avishai, një emër relativisht i panjohur për publikun dhe tregun financiar shqiptar, ndërsa informacioni mbi përvojën e tij konkrete në sektorin bankar mbetet i kufizuar.
Në krye të administrimit të bankës është emëruar Fatbardha Rino, një figurë e njohur në sektorin financiar në Shqipëri, e cila ka mbajtur më herët pozicione drejtuese në disa banka të nivelit të dytë dhe ka qenë drejtoreshë ekzekutive e Iute Pay. Ndërkohë, bordi i bankës përfshin edhe shtetasit Oliver Hemmer dhe Rami Solomon, gjithashtu me origjinë izraelite. Përbërja e bordit dhe struktura e pronësisë ngre pyetje mbi shkallën e kontrollit, qeverisjen e brendshme dhe përfshirjen reale të ekspertizës lokale.
Sipas procedurës, pas miratimit paraprak, Jet Bank ka deri në 12 muaj kohë për të përmbushur të gjitha kërkesat ligjore dhe rregullatore, përfshirë rritjen e kapitalit, ndërtimin e infrastrukturës teknologjike dhe garantimin e sistemeve të sigurisë. Mbetet për t’u parë nëse një bankë që synon të operojë ekskluzivisht në mënyrë digjitale do të arrijë të përmbushë standardet e nevojshme për mbrojtjen e depozitave dhe menaxhimin e rrezikut.
Një tjetër element që ngre dyshime është përshkrimi mjaft i gjerë i aktivitetit të Jet Bank në regjistrimin e saj në QKB. Objekti i veprimtarisë përfshin pothuajse çdo formë aktiviteti financiar, investimi apo konsulence, duke lënë të paqartë fokusin real të bankës dhe strategjinë e saj afatgjatë në tregun shqiptar.
Jet Bank është subjekti i dytë që merr miratim paraprak për hyrje në tregun bankar shqiptar, pas bankës turke Ziraat. Kjo ndodh në një moment kur sektori bankar shqiptar ka kaluar një periudhë të gjatë përqendrimi, duke ulur numrin e bankave nga 16 në 11 që prej vitit 2015, kryesisht përmes blerjeve dhe përthithjeve.
Megjithëse autoritetet flasin për një fazë të re zgjerimi të sektorit bankar, hyrja e aktorëve të rinj, veçanërisht me modele biznesi ende të patestuara në tregun vendas, ngre nevojën për vëmendje të shtuar nga institucionet mbikëqyrëse. Rritja e numrit të bankave nuk përbën domosdoshmërisht garanci për rritjen e stabilitetit financiar, nëse nuk shoqërohet me transparencë të plotë, kapital të mjaftueshëm dhe modele të qarta e të qëndrueshme operimi.