Mes mishit brazilian të porositur nga A.M.G Shpk, kapet 41 kg Kokaine në Durrës

Durrës – Mbi 41 kilogramë kokainë, me një vlerë të përllogaritur rreth 2 milionë euro, janë sekuestruar në Portin e Durrësit, gjatë kontrollit të një kontejneri që kishte ardhur nga Brazili dhe që, sipas dokumentacionit, transportonte mish pule.

Operacioni është zhvilluar nga Sektori për Hetimin e Narkotikëve i DVP Durrës, në bashkëpunim me Drejtorinë Vendore për Kufirin dhe Migracionin Durrës dhe strukturat doganore të Portit të Durrësit, në kuadër të operacionit të koduar “Anchor 3”.

Gjatë kontrollit të imtësishëm të kontejnerit, shërbimet e Policisë kanë konstatuar në kapakët e jashtëm të tij 37 paketime me lëndë të dyshuar narkotike kokainë. Sasia totale rezultoi 41 kilogramë e 350 gramë, ndërsa vlera e saj në treg përllogaritet rreth 2 milionë euro.

Sipas të dhënave të bëra publike lidhur me ngarkesën, kompania që ka sjellë kontejnerin është A.M.G. Sh.p.k., kompani që operon në fushën e shërbimeve ushqimore dhe pijeve (Food and Beverage Services).

Megjithatë, deri në këtë fazë, nuk ka të dhëna zyrtare që e lidhin kompaninë apo drejtuesit e saj me trafikimin e lëndës narkotike. Policia ka bërë të ditur se hetimet vijojnë për të dokumentuar plotësisht rastin, për të përcaktuar origjinën dhe destinacionin e kokainës, si dhe për të identifikuar dhe kapur personat e përfshirë në aktivitetin kriminal.

Ky është rasti i tretë brenda një muaji ku autoritetet godasin tentativa për futjen e lëndëve narkotike në Shqipëri përmes Portit të Durrësit.

Materialet procedurale i janë referuar Prokurorisë për veprime të mëtejshme.