Furtunë në Policinë e Shtetit, ndryshime në disa drejtori kyçe
Ardhja e Skënder Hita në krye të Policia e Shtetit po shoqërohet me një valë ndryshimesh të rëndësishme në strukturat drejtuese, si në nivel qendror ashtu edhe në qarqe.
Një nga lëvizjet më të rëndësishme është largimi i Melsi Koçi nga posti i drejtorit të Operacionales. Në vend të tij pritet të emërohet Alban Dautaj, i cili deri më tani ka drejtuar strukturën e Antiterrorit.
Ndërkohë, në krye të Drejtorisë së Antiterrorit është emëruar Edmond Sula, duke zëvendësuar Dautajn që merr detyrën e re në Operacionale.
Ndryshime janë raportuar edhe në Drejtorinë Vendore të Tiranës, ku është larguar zv/drejtori për Krimet Besmir Dervishi. Në vend të tij mësohet se është emëruar Oliger Torba si zv/drejtor për Krimet.
Lëvizje ka pasur edhe në Drejtorinë e Përgjithshme, ku është larguar drejtori i Krimit Ekonomik Gentian Ndoj, i cili më herët ka qenë edhe kandidat për kreun e BKH-së. Ai pritet të marrë detyrën e zv/drejtorit në Dibër.
Në nivel qarqesh, ndryshime janë regjistruar edhe në Elbasan, ku është larguar zv/drejtori Krenar Guce, si dhe në Lezhë, ku është larguar drejtori Islor Islami.
Një tjetër lëvizje e rëndësishme është emërimi i Petrit Halo, ish-shef i Komisariatit nr.1, si zv/drejtor për Krimet në Shkodër.
Sipas burimeve, ndryshime të tjera në nivel zv/drejtorësh pritet të ketë edhe në drejtoritë vendore të Vlorë dhe Berat.
Këto lëvizje sinjalizojnë një riorganizim të thellë në radhët e Policisë së Shtetit, menjëherë pas emërimit të drejtuesit të ri.