Kujtesë për Lamallarin dhe komisionin! Në garën për të marrë Policinë kandidatë të skeduar nga SHISH për trafik droge
Gara për karrigen e drejtorit të përgjithshëm të Policisë së Shtetit, të lënë bosh prej dorëheqjes së Ilir Prodës, pas protestës së dhunshme të Partisë Demokratike, ku u sulmua “Vila 31” në ish-Bllok, do të jetë mes 16 drejtuesve me eksperiencë të gjatë brenda bluve, mes të cilave edhe 2 gra, të cilët aspirojnë të drejtojnë një prej strukturave më komplekse të sigurisë në vend.
Lista e plotë
Afrim Tafa
Alfred Çepe
Arjanit Arapi
Ejona Gurbardhi
Elidon Çela
Gentian Berberi
Gentjan Shehaj
Idajet Faskaj
Lorenc Panganika
Neritan Nallbati
Pëllumb Seferi
Rebani Jaupi
Saimir Boshnjaku
Skënder Hita
Suela Sulkaj
Tonin Vocaj
Pas publikimit zyrtar të kandidaturave, një komision prej 3 personash, përbërë nga zv/ministrja e Brendshme Silva Caka, sekretarja e Përgjithshme i Ministrisë së Brendshme, Kledia Ngjela dhe kreu i AMP-së Eduart Merkaj, do të vlerësojnë në një afat prej 10 ditësh pune të gjitha dosjet e kandidatëve. Pas kësaj, në një ditë të vetme, të gjithë kandidatët do të intervistohen dhe pikëzohen në një renditje nga më i miri deri të me i dobëti. Brenda 48 orësh, ministri i Brendshëm Besfort Lamallari do t’i përcjellë një emër Këshillit të Ministrave për emërim. Jo domosdoshmërish i rendituri i pari bëhet drejtori i ri i Policisë së Shtetit. Ligji ka parashikuar mundësinë e emërimit të një tjetri, bazuar në vlerësimin e ministrit të Brendshëm.
Disa nga kandidatët për drejtor të Përgjithshëm të Policisë së Shtetit rezultojnë pjesë e një raporti sekret të SHISH me emrat e zyrtarëve të policisë të implikuar në kultivimin dhe trafikimin e drogës. Raporti i zi i SHISH i dhjetë viteve më parë është ndarë fillimisht me Prokurorinë, kryeministrin, Presidentin dhe deputetë anëtarë të Komisionit të Sigurisë Kombëtare. Raporti shqetësues, që kompromentonte rëndë një pjesë të Policisë së Shtetit si garantore e kultivimit dhe trafikimit të drogës, rrodhi edhe në media.
Referuar këtij raporti me evidenca konkrete, opozita bëri disa denoncime publike, duke akuzuar me emra konkretë drejtuesit e policisë të skeduar si të implikuar në aktivitet kriminal. Disa nga 79 emrat e përmendur në atë raport janë përjashtuar nga Policia e Shtetit dhe janë dënuar për implikim në trafikun e drogës.
Disa të tjerë vijojnë të jenë pjesë e Policisë së Shtetit, ndonëse dyshohet se janë nën hetim nga SPAK dhe që mund të arrestohen pasi dalin në komunikimet e Sky Ecc të lidhur me krimin e organizuar. Komision i Posaçëm për verifikimin e kandidatëve ka për detyrë të verifikojë informacionet zyrtare për pastërtinë e figurës të secilit kandidat nëse rezulton në raportet e SHISH, nëse ka përdorur platformën Sky Ecc, nëse është nën hetim nga SPAK etj.
Shqipërisë nuk i duhet një skandal tjetër duke zgjedhur një drejtor policie që është i skeduar nga SHISH dhe ndërkombëtarët për lidhje me krimin e organizuar apo një drejtues që mund të arrestohet në vijim nga SPAK për ekspozim në aplikacionin Sky Ecc për lidhje me krimin e organizuar.
Sa i takon procedurës, pas përfundimit të afatit të aplikimeve, Ministria e Brendshme publikon në faqen zyrtare emrat e kandidatëve. Brenda 10 ditëve, një Komision i Posaçëm i përbërë nga 3 persona, me kryetar një zëvendësministër i Brendshëm dhe 2 anëtarët, sekretari i përgjithshëm i këtij dikasteri dhe kreu i Agjencisë së Mbikëqyrjes Policore, kryen vlerësim paraprak për verifikimin e kushteve ligjore.
Në fund të procesit hartohet lista përfundimtare e kandidatëve që plotësojnë kushtet. Më tej vijon faza e intervistimit, ku shpaloset platforma e secilit me nga 20 minuta në dispozicion. Pas përfundimit, ky komision ka afat 48 orë për të nxjerrë rezultatet me pikëzimin.
Jo domosdoshmërisht i pari i renditur bëhet drejtori i ri i përgjithshëm i Policisë së Shtetit. Ligji thotë që njeri prej kandidatëve të pikëzuar, i konsideruar më i përshtatshëm për detyrën, i propozohet nga ministri i Brendshëm, Këshillit të Ministrave për emërimin e tij.
