Tiranë, tetor 2025 – Kontrolli i Lartë i Shtetit (KLSH) ka konstatuar mangësi serioze në veprimtarinë e Autoritetit të Mbikëqyrjes Financiare (AMF), duke vlerësuar se Bordi i institucionit nuk ka ndërmarrë masa të nevojshme ndaj shoqërive të sigurimit që kanë kryer shkelje të përsëritura, gjë që ka ndikuar në rritjen e riskut në tregun e sigurimeve.
Në auditimin e fundit, i përfshirë në Raportin Vjetor të vitit 2024, që mbulon periudhën 1 janar 2021 – 30 dhjetor 2023, KLSH evidenton se Bordi i AMF-së ka treguar pasivitet në vendimmarrje, duke mos vendosur masa ndëshkuese ndaj kompanive të sigurimeve, edhe pse ato nuk kanë përmirësuar treguesit financiarë dhe situatën e tyre të brendshme.
Sipas raportit, mosmarrja e masave për gjobitjen e shoqërive të sigurimeve për shkeljet e konstatuara ka krijuar një dëm të mundshëm financiar në vlerën nga 9.95 milionë lekë deri në 19.4 milionë lekë, duke ndikuar negativisht në disiplinën dhe rregullsinë e tregut.
Një tjetër shkelje e evidentuar lidhet me mospërllogaritjen e normës së interesit, në total prej 7 milionë lekësh, ndaj kompanive që nuk kanë plotësuar pjesën përkatëse në fondin e kompensimit. KLSH paralajmëron se kjo neglizhencë ka krijuar efekt negativ në fondin e kompensimit, duke rrezikuar mbulimin e detyrimeve të shoqërive të sigurimit ndaj qytetarëve të siguruar.
KLSH kërkon që AMF të marrë masa konkrete për forcimin e mekanizmave të mbikëqyrjes dhe disiplinës në treg, në mënyrë që të garantohet stabiliteti financiar dhe mbrojtja e interesave të të siguruarve.