Një konflikt familjar për çështje pronësie ka degraduar në dhunë, duke çuar në arrestimin e pesë personave, mes tyre edhe ish-drejtorin e Policisë së Vlorës, Sokol Mulosmani.
Sipas informacioneve paraprake, Sokol Mulosmani, së bashku me dy vëllezërit e tij, Përparimin dhe Hamdiun, janë përplasur fizikisht me vëllanë e tyre, Besnik Mulosmani, për një mosmarrëveshje pronësie. Konflikti ka ndodhur në rrugën “Njazi Meka”, në prani edhe të djalit të Besnikut, Blerimit.
Pas ndërhyrjes së menjëhershme të Komisariatit nr. 4 në Tiranë, pesë personat e përfshirë në konflikt janë arrestuar, ndërsa policia ka bërë të mundur neutralizimin e situatës, e cila mund të kishte sjellë pasoja edhe më të rënda.
Si pasojë e përplasjes, Besnik Mulosmani dhe djali i tij kanë pësuar dëmtime.
Ngjarja rikthen në vëmendje edhe përgjegjësinë që mbartin ish-funksionarët e zbatimit të ligjit. Një person që ka drejtuar strukturat e Policisë së Shtetit pritet të jetë shembull i respektimit të ligjit dhe zgjidhjes së konflikteve përmes institucioneve, jo të përfshihet në episode dhune.
