Artan Tafani, i cili ka pranuar të bashkëpunojë me drejtësinë, po dëshmon sot në gjyqin penal ndaj kryetarit të Bandës, Laert Haxhiu. para gjyqtarëve ngjarjen kriminale që ka të bëjë me tritolin e vendosur në biznesin e reperit Noizy.
“Një përleshje ka ndodhur mes Kleviol Ahmetajt dhe Noizyt, ku ata janë ofenduar në platformën TikTok. Më pas, Klevioli ka shkuar në Durrës. Laerti e ndiqte Kleviolin në TikTok, pasi ishin shokë. Ai përmendte se duhej të merrnim masa ndaj Noizyt, pasi kishte goditur Kleviolin, duke sugjeruar vendosjen e tritolit. Atë natë, nëna e Laertit e thirri dhe e pyeti pse Kleviolin e kishin goditur. E vunë në presion, motra dhe nëna e tij. Pas pak, Laerti tha se duhej të vepronim dhe të vendosnim tritol. E përgatitëm. Kishim tritol në shtëpi, të cilin e merrnim nga Tepelena. U ngritëm dhe e përgatitëm, disa copa prej 100 gramësh. E izoluam me ngjitës, unë e bëra atë. Kishim benzinë të zezë që e kishim blerë në Palma Nova. Vendosëm targat e një Benzi në makinën time. Lulzim Spahia e dinte se ku do të shkonim. Ai sugjeroi ta hidhnim në lokal, në katin e dytë ku ishin dritaret hapur me karrige në shesh, brenda. Parkova makinën në dalje. Lulzimi ndezi makinën. Nuk po gjeja shkallët. U ktheva sërish te makina dhe i thashë se nuk po gjeja shkallët. Lulzimi foli me Laertin. I thashë se duhej ta vendosnim te dyqani poshtë. Vendosëm ta vendosnim te dyqani i rrobave. E vendosa, ndeza fitilin dhe ika. E dëgjuam shpërthimin teksa iknim. Pastaj shkuam në Astir dhe parkova makinën,” tregoi ai.
Këtë dëshmi, i penduari i drejtësisë, e kishte dhënë edhe më parë në procesin ku po gjykohen të pandehurit e tjerë.
