Hetimet për helmimin e 64 studentëve: Prokuroria merr në pyetje drejtorin e AKU-së për Tiranën, sekuestrohet dosja për SORI-AL
Prokuroria e Tiranës është duke hetuar rolin e zyrtarëve të Agjencisë Kombëtare të Ushqimit pas helmimit të 64 studentëve të Akademisë së Sigurisë, që dyshohet të ketë ardhur për shkak të ushqimit që shërbehet katering nga kompania SORI-AL, e lidhur me biznesmenin Nikolin Jaka.
Burime pranë Prokurorisë bëjnë me dije se është marrë në pyetje Erand Muharremi, drejtori i komanduar i AKU-së për Tiranën, lidhur me kontrollet e kryera ndaj shoqërisë SORI-AL, si dhe janë sekuestruar të gjitha dokumentet dhe praktikat në këtë drejtim.
Sektori për Hetimin e Krimit Ekonomik i Policisë së Tiranës, mbi bazën e detyrave të lëna nga Prokuroria, ka marrë dëshminë edhe të dy inspektorëve të AKU-së, ndërsa dy të tjerë do të merren në pyetje gjatë javës.
Hetuesit kanë sekuestruar ndërkohë të gjitha dokumentet pranë AKU-së, për të verifikuar nëse kompania SORI-AL i është nënshtruar kontrollit sipas parashikimeve ligjore.
Prokuroria pret ndërkohë analizat zyrtare, përmes të cilave do të përcaktohet shkaku i helmimit të 64 studentëve të Akademisë së Sigurisë, të cilët u paraqitën në spital me dhimbje barku, të vjella, temperaturë etj. Kjo është hera e dytë që studentët e Akademisë së Sigurisë janë helmuar dhe dyshohet si pasojë e ushqimit.
