TIRANË- Një grup prej 52 studentësh të Akademisë së Sigurisë ka rënë pre e helmimit për shkak të makaronave të kontaminuara me bakteret Escherichia coli dhe stafilokok. Kjo është konfirmuar nga analiza e Autoritetit Kombëtar të Ushqimit, i cili ka vendosur të bllokojë aktivitetin e kompanisë së kateringut “SORI-Al”, e drejtuar nga Alma Tafani.
Sipas AKU-së, nga nëntë mostra të marra për analizë, tetë kanë rezultuar brenda normave të pranueshme, ndërsa një kampion makaronash të gatshme, i marrë nga kuzhina e Akademisë së Sigurisë në Sauk, ka dalë pozitiv për dy bakteret. Akademia ofronte tre vaktet për studentët përmes kateringut nga kompania SORI-Al, administratorja e së cilës është duke u hetuar në gjendje të lirë.
Përveç kësaj, është vendosur një masë administrative me gjobë prej 1,500,000 lekësh për ushqim të pasigurt dhe kushte higjieno-sanitare të papërshtatshme.
Policia ka arrestuar kuzhinierin Kujtim Ballgjini dhe teknologen e ushqimit Kristjana Plaka nga kompania që siguron ushqimin për Akademinë e Sigurisë, ndërsa një tjetër teknologe ushqimi nga SORI-Al është lënë në gjendje të lirë.
Njoftimi i AKU
Autoriteti Kombëtar i Ushqimit, në kuadër të transparencës dhe informimit publik, njofton se lidhur me rastin e dyshuar të helmimit të disa kursantëve në Akademinë e Sigurisë, janë marrë në analizë nëntë mostra (lëndë të para dhe produkte të gatshme).
Sipas informacionit nga laboratori i Referencës ISUV, tetë mostra kanë rezultuar brenda normave, ndërsa një kampion i makaronave, produkt i gatshëm, ka dalë jokonform për nivelin e Escherichia coli dhe B staphylococcus koagulaze pozitive, mostër e cila është marrë në kuzhinën e akademisë.
Për këto gjetje, AKU ka ndërmarrë masën e pezullimit të aktivitetit deri në përmbushjen e kërkesave ligjore nga OBU për pastrimin dhe dezinfektimin e ambienteve dhe pajisjeve të punës.
Në vazhdim, në adresën Garnizoni “Skënderbej” pranë Forcave të Armatosura, ku është zhvilluar prodhimi i këtyre produkteve, janë evidentuar shkelje nga institucionet shëndetësore në raportin përfundimtar të hetimit epidemiologjik për rezultatet jokonforme në lidhje me higjenën, duke përfshirë kampionët e ruajtura dhe disa pajisje pune.
AKU ka vendosur gjithashtu të ndalojë aktivitetin e subjektit SORI-AL edhe në adresën Garnizoni “Skënderbej” pranë Forcave të Armatosura.
Një masë administrative me gjobë prej 1,500,000 lekësh është vendosur gjithashtu për ushqim të pasigurt dhe kushte higjieno-sanitare.
Kompania është ngarkuar me detyrën për të kryer procedurat e asgjësimit të produkteve të bllokuara që kanë rezultuar jokonform.
Derisa të mbyllet viti 2025, Sori-Al ka fituar 75 tenderë publikë, me një vlerë totale prej 4.2 miliardë lekësh.
Lajmi është duke u përditësuar…
