Grabitja në Yrshek, autorët hynë për para, por dolën huq!
Zbardhen detaje të reja nga grabitja e ndodhur në magazinat e një kompanie postare në Yrshek. Sipas informacioneve, katër autorët, tashmë të identifikuar nga Policia, kishin hyrë me synimin për të vjedhur para.
Megjithatë, plani i tyre ka dështuar pasi në ambientet ku hynë kryhej vetëm magazinimi i pakove dhe nuk qarkullonin para. Për të mos u larguar duarbosh, autorët kanë marrë tre pako dhe më pas janë larguar me shpejtësi nga vendi i ngjarjes.
Ngjarja ka ndodhur rreth orës 01:10. Gjatë grabitjes, autorët kanë kërcënuar me një pistoletë lodër, e cila më pas është gjetur dhe sekuestruar nga shërbimet e Policisë.
Në vijim të hetimeve, në fshatin Kashar, në lagjen “Sorraj”, është konstatuar duke u djegur një automjet, i cili dyshohet se është përdorur nga autorët për t’u larguar pas grabitjes.
Policia vijon veprimet për kapjen e katër të dyshuarve, ndërsa hetimet po vazhdojnë për dokumentimin e plotë të ngjarjes dhe zbardhjen e rolit të secilit prej tyre.
