Grabitja e taksistit fundos 27-vjeçarin hajdut, zbardhen 5 krime
Grabitja e taksistit fundos 27-vjeçarin hajdut, zbardhen 5 krimeNjë grabitje e dhunshme e regjistruar në një taksi që qarkullonte në aksin Tiranë–Elbasan ka çuar policinë drejt zbardhjes së një sërë ngjarjesh kriminale, për të cilat dyshohet se kanë të njëjtin autor.
Ngjarja ndodhi pranë Palmanovës, ku një shofer taksie ra pre e një sulmi gjatë një udhëtimi që kishte nisur nga Aeroporti i Rinasit. Pasagjeri që ai kishte marrë në Rinas gjatë rrugës e ka kërcënuar me sëpatë dhe me një armë zjarri tip pistoletë, duke i marrë para dhe një varëse floriri nga qafa. Më pas autori është larguar nga vendngjarja për tu arrestuar nga Policia rreth 15 minuta më vonë.
Për këtë ngjarje në pranga është vënë 27-vjeçari Trazhgim Maçi, i cili rezulton të jetë autor edhe në pesë episode të tjera kriminale të ndodhura gjatë muajit qershor në Tiranë, Krujë dhe Durrës.
Sipas Policisë, më 5 qershor ai dyshohet se ka vjedhur para nga portofoli i një qytetari në tregun e Fushë Krujës. Pesë ditë më vonë, në një biznes në Tiranë, ai akuzohet se ka kërcënuar pronarin me mjet prerës dhe i ka marrë para si dhe një varëse floriri.
Një tjetër ngjarje është regjistruar më 12 qershor në kryeqytet. Hetimet tregojnë se 27-vjeçari dyshohet të ketë kërcënuar me një send të ngjashëm me armë zjarri pronarin e një subjekti, duke i grabitur një varëse floriri dhe duke e goditur fizikisht.
Po ashtu, ai dyshohet të jetë autor i grabitjes së një taksisti në Fushë Krujë më 15 qershor, ku janë marrë para, dy telefona celularë dhe një orë dore. Një rast tjetër me të njëjtën skemë është dokumentuar në Shënavlash të Durrësit, ku viktimë ka qenë sërish një drejtues taksie.
Policia bën të ditur se hetimet vijojnë për të verifikuar nëse i arrestuari ka qenë i përfshirë edhe në ngjarje të tjera të ngjashme, ndërsa po punohet për dokumentimin e plotë të aktivitetit të tij kriminal.
