Një delegacion nga Policia e Tiranës dhe Prokuroria ka marrë pjesë në përmbylljen e operacionit ndërkombëtar antidrogë të koduar “Rrjeti”, i zhvilluar në Kolumbi.
Burime zyrtare bëjnë me dije se në këtë mision ishin të pranishëm prokurori i Tiranës, Ritvan Sukaj, zv/drejtori i Hetimit të Krimit në Policinë e Tiranës, Erion Ismaili, si dhe shefi i Hetimit të Trafiqeve dhe Narkotikëve, Arber Zemani.
Delegacioni shqiptar ndodhej në qytetin Medellín prej së hënës, ku së bashku me autoritetet kolumbiane kanë punuar për finalizimin e detajeve të fundit të megaoperacionit “Rrjeti”. Ky aksion konsiderohet një nga më të rëndësishmit në kuadër të luftës kundër trafikut ndërkombëtar të drogës dhe ka shënuar një bashkëpunim të ngushtë mes institucioneve shqiptare dhe partnereve ndërkombëtarë.
Operacioni “Rrjeti” synon çmontimin e strukturave kriminale që veprojnë në disa shtete dhe që dyshohet se kishin lidhje edhe me grupime shqiptare të përfshira në Prostitucion dhe trafik droge.
Detajet nga Operacioni:
Një grup që trafikonte vajza nga Azia Qendrore dhe Amerika Latine në Shqipëri me qëllim shfrytëzimin e tyre për prostitucion është goditur nga Seksioni për Hetimin e Trafiqeve në Tiranë, në bashkëpunim me Prokurorinë dhe Policinë Kombëtare të Kolumbisë, Policinë kroate, EUROPOL dhe EUROJUST. Në kuadër të operacionit “Rrjeti”, sipas Prokrorisë së Tiranës, e cila udhëhoqi hetimet, u lëshuan 19 masa sigurie, 9 të cilat u ekzekutuara në Shqipëri dhe 10 në Kolumbi, 3 persona u shpallën në kërkim. Në vendin tonë u ekzekutuan 7 masa sigurie “arrest me burg”, 2 masa “detyrim paraqitje”, 2 të tjerë u shpallën në kërkim, ndësa organizatori Lukas Betancur është arrestuar në Kolumbi.
