Në Gjykatën Administrative të Apelit pritet të zhvillohet një proces gjyqësor, sa interesant, aq edhe i çuditshëm. Drejtoria e Përgjithshme e Tatimeve ka gjobitur Strukturën e Posaçme Anti-Korrupsion (SPAK), për “moshlyerje detyrimesh”.
Publiku është njoftuar në mënyrë periodike mbi sekuestrimet që SPAK-u kryen tek pronat e eksponentëve të krimit të organizuar dhe korrupsionit, në të cilat gjithnjë theksohet se Prokuroria e Posaçme ka një fokus të veçantë tek veprimtaria financiare e tyre.Por, duket se edhe vetë institucioni lider në luftën kundër pasurive të paligjshme, ka probleme me menaxhimin financiar.
Nuk u arrit të zbulohej se cilat janë saktësisht detyrimet e pashlyera të SPAK-ut pranë administratës tatimore. Megjithatë, të dhënat e siguruara deri më tani tregojnë se përplasja mes dy institucioneve ka nisur të paktën një vit e gjysëm më parë.Drejtoria e Tatimeve Tiranë, në datën 9 Prill 2024, i dërgn Prokurorisë së Posaçme “Njoftim Vlerësimi për Detyrimet Tatimore”.
Prokuroria e Posaçme duket se nuk ka qenë dakord me Aktin e Tatimeve të kryeqytetit dhe ankohet pranë eprorëve të tyre, në Drejtorinë e Përgjithshme. Ky ankim u rrëzua me një vendim të datës 21 Qershor 2024. Pra, mbeti në fuqi vendimi që detyronte SPAK-un të shlyente detyrimet.Por, Prokuroria e Posaçme sërish nuk ishte dakord me zyrtarët tatimorë dhe dorëzoi një ankim në Gjykatën Administrative.
Sipas të dhënave , Gjykata Administrative e Apelit e ka regjistruar padinë e SPAK-ut në 6 Tetor 2025 dhe tashmë pritet që së shpejti të thërrasë palët, Tatimet dhe Prokurorinë e Posaçme për të dëgjuar argumentat e tyre dhe në fund të vendosë se cili prej tyre ka të drejtë./ Boldnews