“Frigoriferi nuk punon…”/ Si u mor peng klientja tek Zanussi te Dogana në Tiranë!
Një konflikt për një frigorifer banak ka përfunduar me arrestimin e dy pronarëve të një dyqani elektroshtëpiakesh në zonën e Ish-Doganës, në Tiranë. Sipas policisë, në pranga janë vënë Sefedin Ahmetaj pronar i dyqanit “Zanusi” dhe Edjola Harunaj avokatja e tij, të cilët dyshohet se janë përfshirë në një përplasje me një kliente. Sipas hetimeve paraprake, konflikti ka nisur pasi klientja është kthyer në dyqan me pretendimin se frigoriferi banak i blerë nuk funksiononte dhe ka kërkuar rimbursimin e plotë të shumës.
Kërkesa është refuzuar nga pronarët, ndërsa situata dyshohet se ka agravuar deri në mbajtjen e saj kundër vullnetit brenda ambienteve të biznesit për rreth dy orë dhe ushtrim dhune ndaj saj. Gjatë ndërhyrjes së Policisë së Tiranës, situata është përshkallëzuar edhe me efektivët, ku pronari dhe avokatja dyshohet se kanë kundërshtuar me forcë policinë. Sipas njoftimit zyrtar, Edjola Harunaj akuzohet gjithashtu se ka dëmtuar lehtë një punonjës policie gjatë shoqërimit, ndërsa hetimet vijojnë për zbardhjen e plotë të ngjarjes.
Njoftimi i Policise:
Shërbimet e Komisariatit të Policisë Nr. 6 arrestuan në flagrancë shtetasit Sefedin Ahmetaj, 63 vjeç, dhe Edjola Harunaj 41 vjeçe, pasi dyshohet se, gjatë një konflikti për motive të dobëta me një kliente në një dyqan elektroshtëpiakesh në zonën e Ish-Doganës, e kanë kanosur, i kanë hequr lirinë duke e mbajtur kundër vullnetit të saj në ambientet e subjektit dhe kanë ushtruar dhunë fizike ndaj saj.
Gjatë ndërhyrjes së shërbimeve të Policisë, këta shtetas kanë kundërshtuar me forcë punonjësit e Policisë, ndërsa shtetasja Edjola Harunaj dyshohet se ka goditur për shkak të detyrës një punonjës policie, duke i shkaktuar dëmtime të lehta.