Detaje të reja kanë dalë nga hetimet për ngjarjen e rëndë të ndodhur mbrëmjen e kaluar në zonën e Shkozës, ku mbeti i plagosur një efektiv i Policisë së Tiranës.
Sipas burimeve pranë policisë dhe grupit hetimor, efektivi i Komisariatit nr. 4, Anxhelo Kumaraku, ndodhej pranë banesës së tij i shoqëruar nga komshiu i tij, Klejdi Spaja, një person që raportohet se ndodhet nën masën e sigurisë “arrest shtëpie” për armëmbajtje pa leje.
Hetuesit po verifikojnë pistën se shënjestër e mundshme e atentatit mund të ketë qenë komshiu i efektivit, për shkak të precedentëve penalë dhe konflikteve të mundshme të mëparshme. Megjithatë, dinamika e plotë e ngjarjes mbetet ende nën hetim dhe nuk ka një version zyrtar përfundimtar.
Burime jozyrtare bëjnë me dije se efektivi Kumaraku ka marrë plagë në të dyja këmbët, por ndodhet jashtë rrezikut për jetën. Një autpmjet tip BMW e vitit 2023 është sekuestruar.
Në lidhje me ngjarjen, policia ka shpallur në kërkim disa persona. Sipas burimeve hetimore, Aldo Lika dyshohet si një prej personave të përfshirë, ndërsa Ali Lika po hetohet si bashkëpunëtor i mundshëm në episodin kriminal. Roli dhe përfshirja e secilit mbeten ende objekt verifikimi nga grupi hetimor.
Burime pranë hetimit raportojnë gjithashtu se në vendngjarje ka qenë i pranishëm edhe Leonard Doko, ndërsa prania dhe roli i tij po verifikohen nga autoritetet.
Nga këqyrja paraprake e vendit të ngjarjes, mësohet se janë sekuestruar 7 gëzhoja, provë materiale që pritet të ndihmojë hetuesit në përcaktimin e armëve të përdorura dhe rindërtimin e dinamikës së plotë të të shtënave.
Ndërkohë, policia vijon kontrollet për lokalizimin e personave të shpallur në kërkim dhe zbardhjen e plotë të motiveve të ngjarjes.