Publikohen emrat e disa kandidatëve për Drejtor të Përgjithshëm të Policisë së Shtetit
Teksa kanë mbetur edhe dy ditë nga përfundimi i afatit për dorëzimin e aplikimeve në garën për postin e Drejtorit të Përgjithshëm të Policisë së Shtetit, mediat kanë zbuluar disa nga emrat e oficerëve që kanë paraqitur kandidaturën.
Mes kandidatëve është edhe oficeri i karrierës Pëllumb Seferi, i cili ka rreth 28 vite eksperiencë në Policinë e Shtetit. Aktualisht ai mban postin e drejtorit të Shoqatës së Studentëve Europianë që janë diplomuar nga FBI në Shtetet e Bashkuara të Amerikës.
Në garë është futur gjithashtu edhe drejtori aktual i Policisë së Vlorës, Elidon Çela, i cili numëron rreth 25 vite karrierë në radhët e policisë dhe konsiderohet një nga kandidatët potencialë për këtë post.
Një tjetër kandidat është edhe drejtori i Policisë së Durrësit, Afrim Tafa. Ndërkohë, kandidatura kanë paraqitur edhe oficerët Lutfi Minxhozi dhe Idajet Faskaj.
Burime mediatike bëjnë të ditur se në dy ditët e mbetura deri në mbylljen e afatit mund të shtohen edhe emra të tjerë, mes të cilëve janë përfolur Tonin Vocaj dhe drejtori aktual i Policisë së Fierit, Skënder Hitaj.
