Janë zbardhur detaje të reja lidhur me vrasjen e 55-vjeçares Bardhe Zici në Shkodër. Sipas të dhënave paraprake të hetimit, policia ka sekuestruar pamjet e kamerave të sigurisë në banesën e familjes Zici, ku dyshohet se është fiksuar momenti kur autori i dyshuar, 62-vjeçari Shtjefën Zici, merr armën e gjahut dhe më pas i afrohet derës kryesore të oborrit.
Në pamje, ai shihet duke hapur derën dhe duke vëzhguar nëse në zonë po kalonin persona të tjerë. Më pas hyn në banesë, ku dyshohet se qëllon për vdekje bashkëshorten e tij. Pas ngjarjes, 62-vjeçari nuk ka tentuar të largohet, por ka qëndruar në vendngjarje deri në mbërritjen e policisë.
Sipas hetimeve paraprake, dyshimet e para lidhen me motive xhelozie. Burime nga grupi hetimor bëjnë me dije se pak para krimit ka rënë telefoni i viktimës, ndërsa ende nuk është përcaktuar se kush e ka telefonuar. Po hetohet nëse telefonata ka qenë nga djali i çiftit që jeton në Kanada, vajza apo ndonjë i afërm tjetër. Hetuesit po verifikojnë nëse ky episod ka ndikuar në përshkallëzimin e konfliktit.
Ngjarja e rëndë ndodhi pasditen e së enjtes në banesën e familjes Zici, në zonën e Unazës Lindore të Shkodrës.
Ndaj Shtjefën Zicit është ngritur akuza për veprën penale “vrasje për shkak të marrëdhënieve familjare”, ndërsa hetimet vijojnë për të zbardhur plotësisht rrethanat dhe motivin e krimit.
