Depërtimi i krimit në institucione? Gazetari italian: Një sasi e madhe parash pastrohen nga grupe shqiptare
Gazetari investigativ italian, Nello Trocchia, në një intervistë për emisionin “Oponencë” në News24, diskutoi mbi situatën e kriminalitetit në Shqipëri, grupet kriminale dhe pastrimin e parave, si dhe lidhjet e tyre me pushtetin.
Gjatë bisedës, ai e vuri në dukje si shumë problematike shtrirjen e gjerë të mafies shqiptare. Ai rikujtoi një takim të zhvilluar në vitin 2019, ku, sipas tij, përfaqësues të qeverisë Rama janë takuar me një individ të përfshirë në krim.
“Nga marijuana kaluan te heroina dhe kokaina. Kjo është një sasi e madhe parash që ata duan ta pastrojnë. Kjo shton nevojën për të korruptuar edhe administratën publike. Depërtimi i këtyre strukturave në administratë është i dukshëm, dhe në librin tim për herë të parë përmend se çfarë ndodhi gjatë hetimit antimafia, i cili tregon se në 2019 në Aruba u zhvillua një takim mes një krimineli dhe përfaqësuesve të qeverisë Rama. E kam publikuar këtë informacion dhe para publikimit e kam pyetur zotin Rama për një sqarim, por pavarësisht përpjekjeve të mia, nuk kam marrë një përgjigje. Ky informacion fliste për një bashkëpunim mes një karteli kriminal dhe një përfaqësuesi të qeverisë Rama. Në Shqipëri ka pasur përfaqësues që janë përfshirë në hetime dhe janë detyruar të japin dorëheqje, siç ishte rasti me ministrin e Brendshëm që kishte lidhje me aktivitetin e zyrës së tij… Por kush po ndërtuon resorte dhe hotele, kush po çimenton vendin? Sigurisht, sipërmarrës të mëdhenj, por gjithashtu ka një pjesë të investimeve që janë realizuar nga krimi i organizuar,” tha ai, duke theksuar: “Kur flasim për mafien shqiptare, ajo është ndër më të parat në Europë. Ka pasur luftë mes bandave shqiptare,” u shpreh Trocchia.