Cili ishte shkaku? Detajet nga aksidenti fatal në Tiranë–Durrës
Detaje të reja janë zbuluar nga aksidenti i një dite më parë në aksin Tiranë–Durrës, ku humbi jetën drejtuesi i një autobusi dhe u plagosën disa persona të tjerë.
Sipas informacioneve të siguruara, në autobus ndodheshin gjithsej 14 persona, konkretisht drejtuesi i mjetit dhe 13 pasagjerë.
Burime pranë hetimit bëjnë me dije se një nga pistat kryesore që po verifikohet është se drejtuesi i autobusit mund të ketë pësuar një infarkt ose arrest kardiak gjatë drejtimit të mjetit, duke humbur kontrollin dhe dalë nga rruga, ku autobusi u përmbys në anë të saj. Këtë dyshim e përforcon edhe fakti se në vendngjarje nuk janë konstatuar gjurmë frenimi, çka mund të tregojë se drejtuesi nuk ka pasur mundësi të reagojë për të shmangur aksidentin.
Po ashtu, nga verifikimet e kryera rezulton se drejtuesi i autobusit nuk konsiderohej një shofer problematik. Në të dhënat e Policisë ai figuron të ketë marrë vetëm dy masa administrative në të kaluarën, të dyja për parkim të gabuar, ndërsa nuk rezulton të ketë pasur shkelje të rënda të Kodit Rrugor.
Grupi hetimor vijon punën për zbardhjen e plotë të rrethanave të aksidentit, ndërsa ekspertiza mjeko-ligjore pritet të përcaktojë nëse shkaku i humbjes së kontrollit të autobusit lidhet me një problem të papritur shëndetësor të drejtuesit.
