Deputeti socialist Erion Braçe ka ngritur një akuzë të fortë ndaj kompanisë që tregton cigaret elektronike IQOS, duke e cilësuar veprimtarinë e saj si një krim të drejtuar ndaj fëmijëve.
Përmes një reagimi publik, Braçe denoncon se reklamat e produktit janë të dukshme në hapësirat online e fizike, pavarësisht se ligji i ndalon rreptësisht. Ai theksoi se ka një muaj që dokumenton me foto praktikat e reklamimit, shitjeve me oferta dhe dhuratave promovuese.
“Çdo gjë që po bën IQOS si reklamë në fillim, shitje me ofertë apo dhuratë, është krim. Ligji është shumë i qartë dhe po shkelet brutalisht – si krim! Reklama është në sytë e të gjithëve, me miliona shikime në ditë. Shiheni, ja ku e keni!”, – u shpreh Braçe.
Deputeti akuzoi institucionet përgjegjëse për mungesë veprimi, duke u pyetur nëse do të ndërmarrin masa konkrete ndaj shkeljeve.
“Kam një muaj që dokumentoj me foto këtë krim; po ndonjë nga institucionet do bëjë të njëjtën gjë? Apo për të gjithë është punë koti?! Unë nuk kam punë tjetër, do merrem çdo ditë me këtë krim; fëmijët janë mbi çdo punë tjetër!”, – theksoi ai.
Braçe paralajmëroi se do të vazhdojë ta ngrejë këtë çështje publikisht, derisa institucionet të marrin masa për ndalimin e reklamimit të cigareve elektronike dhe mbrojtjen e fëmijëve nga ndikimi i tyre.