Atentati me tritol në Gjirokastër, humb jetën Beqir Devolli, plagoset 26-vjeçari
GJIROKASTËR – Beqir Devolli, 45 vjeç, i njohur me nofkën “Çilo Hunderri”, humbi jetën pas atentatit me tritol ndaj automjetit të tij në bulevardin “18 Shtatori” në Gjirokastër. Nga shpërthimi mbeti i plagosur edhe 26-vjeçari Erigels Mela, i cili udhëtonte si pasagjer në automjet.
Ngjarja ndodhi rreth orës 22:00 të së premtes, kur automjeti tip “Mercedes-Benz”, në pronësi dhe drejtim të Devollit, shpërtheu në lëvizje. Drejtuesi pësoi plagë të rënda dhe, pavarësisht ndihmës mjekësore, ndërroi jetë mëngjesin e së shtunës, gjatë transportimit me autoambulancë drejt Spitalit të Traumës.
Sipas dyshimeve paraprake, lënda plasëse ishte vendosur poshtë sediljes së shoferit, çka i ka orientuar hetuesit drejt pistës se objektiv i atentatit ishte vetë Devolli. Dyshohet se shpërthimi u aktivizua me telekomandë nga një distancë prej rreth 30 metrash, ndërsa sasia e eksplozivit ende nuk është përcaktuar.
Pas shpërthimit, automjeti humbi kontrollin dhe përfundoi mbi trafikndarëse. Ngjarja ndodhi vetëm pak metra larg Drejtorisë Vendore të Policisë së Gjirokastrës.
Dyshimet për objektivin e atentatit
Fillimisht, hetimet u përqendruan te 26-vjeçari Erigels Mela, për shkak të një ngjarjeje të mëparshme në prill 2025, kur automjeti i tij tip “Range Rover” u përfshi nga flakët në lagjen Dunavat. Megjithatë, ajo ngjarje nuk u zbardh dhe nuk u identifikuan autorë apo motive kriminale.
Me avancimin e hetimeve, vëmendja u zhvendos te e kaluara e Beqir Devollit. Sipas dyshimeve paraprake, ai mund të ketë qenë objektivi i sulmit, ndërsa Mela ishte bashkuar me të rreth 700 metra përpara vendit ku ndodhi shpërthimi.
Devolli dyshohet se mund të ketë pasur përfshirje në trafikun e drogës në Janinë të Greqisë, ndërsa në Shqipëri, sipas të dhënave të bëra publike, nuk rezulton të ketë precedentë penalë.
Hetimet vijojnë, pa autorë të dyshuar
26-vjeçari Erigels Mela po merr trajtim mjekësor në spitalin e Gjirokastrës dhe ndodhet jashtë rrezikut për jetën.
Policia dhe grupi hetimor po punojnë për të zbardhur rrethanat e atentatit, përfshirë kohën dhe vendin e vendosjes së lëndës plasëse, mënyrën e aktivizimit dhe mundësinë që autorët të kenë ndjekur lëvizjet e viktimës.
Deri më tani, nuk ka persona të dyshuar për ngjarjen. Fakti që shpërthimi ndodhi në një automjet në lëvizje dhe në afërsi të institucioneve të sigurisë mbetet një nga elementet që pritet të marrë përgjigje gjatë hetimeve.
