Një ngjarje e rëndë është regjistruar mbrëmjen e së dielës në qytetin e Elbasanit, ku tre persona mbetën të plagosur pas të shtënave me armë zjarri.
Sipas informacioneve paraprake, rreth orës 20:30, në lagjen “Vullnetari”, në verandën e një lokali, një person ende i paidentifikuar ka qëlluar me pistoletë në drejtim të tre shtetasve.
Si pasojë e të shtënave janë plagosur Bjorgi Hoxha, 19 vjeç, Renaldo Mance, 31 vjeç, dhe Armand Tomorrica, 32 vjeç. Të tre janë transportuar për ndihmë mjekësore dhe ndodhen jashtë rrezikut për jetën.
Në momentin e ngjarjes, brenda lokalit ndodhej një oficer policie jashtë shërbimit, i cili, sapo ka dëgjuar të shtënat, ka dalë menjëherë dhe është vënë në ndjekje të autorit.
Gjatë largimit, autori ka hedhur armën e zjarrit, por ka mundur të arratiset në thellësi të lagjes. Forca të shumta policie kanë rrethuar zonën dhe vijojnë kontrollet intensive për lokalizimin dhe kapjen e tij.
Ndërkohë, grupi hetimor, nën drejtimin e Prokurorisë, po kryen veprimet procedurale në vendngjarje për të zbardhur plotësisht rrethanat e ngjarjes, si dhe për të siguruar provat që do të çojnë në identifikimin dhe arrestimin e autorit.