Drejtuesi i Prokurorisë së Posaçme, Altin Dumani, ka raportuar sot para deputetëve mbi situatën e kriminalitetit në vend për vitin 2024, duke vënë theksin te trafiku i lëndëve narkotike si një nga veprat penale me rrezikshmëri më të lartë.
Sipas Dumanit, trafiku i narkotikëve ruan një nivel shumë të lartë rreziku, pavarësisht një uljeje të lehtë gjatë vitit 2024.
Ai tha se kjo tendencë lidhet me goditjet e suksesshme të agjencive ligjzbatuese dhe zhvendosjen e korridoreve të trafikut. Megjithatë, aktiviteti kriminal mbetet i përhapur dhe i sofistikuar.
“Referuar matjes së nivelit të riskut sipas veprave penale, rezulton se kriminaliteti me nivel të lartë të krimit ekonomik paraqet nivel të lartë rreziku, me tendencë sofistikimi dhe shtrirje të gjerë gjeografike. Pastrimi i parave dhe grupet e strukturuara kriminale mbeten në nivel të rrezikut të lartë, duke shënuar rritje progresive të procedimeve, sidomos në funksion të aktiviteteve që burojnë nga trafiku i narkotikëve dhe veprimtaria ndërkombëtare e grupeve kriminale. Trafiku i narkotikëve ruan një nivel shumë të lartë rreziku, megjithëse viti 2024 ka një ulje të lehtë që lidhet me goditjet e suksesshme të agjencive ligjzbatuese dhe zhvendosjen e korridoreve të trafikut. Ndërkohë, trafikimi i qenieve njerëzore klasifikohet në nivel mesatar rreziku, me numër të ulët rastesh, por me potencial rritjeje për shkak të natyrës së fshehtë, transnacionale të veprës.
Lidhur me tipologjinë e grupeve kriminale, ato vijojnë të jenë aktive lidhur me trafikimin e lëndëve narkotike, kryesisht në trafikun e kokainës dhe kanabisit”, tha Dumani.
Grupet kriminale shqiptare vijojnë të jenë aktive në trafikun e kokainës dhe kanabisit, me shtrirje në disa vende të Bashkimit Evropian si Spanja, Belgjika, Holanda, Franca dhe Gjermania, si dhe në Norvegji, Zvicër dhe Mbretërinë e Bashkuar.
Sipas raportimit të Dumanit, këto grupe sigurojnë blerjen e kokainës në vendet e prodhimit në Amerikën Latine, përfshirë Bolivinë, Meksikën, Perunë dhe Paraguain.
Dumani shtoi se grupet kriminale karakterizohen nga një strukturë hierarkike, përdorimi i komunikimeve të koduara dhe pastrimi i parave përmes formave të avancuara, përfshirë edhe kriptovalutat.
Gjatë vitit 2024, janë identifikuar 16 grupe kriminale me rrezikshmëri të lartë, 10 prej të cilave janë provuar në gjykatë për karakterin e tyre kriminal.
“Këto grupe karakterizohen nga strukturë hierarkike, përdorimi i komunikimeve të koduara, dhe pastrimi i parave. Janë aktive në Tiranë, Durrës, Shkodër, Kukës, Lezhë, Elbasan dhe Vlorë”, tha mes të tjerash Dumani.