Buja e “rilindjes ushtarake” të Shqipërisë po zbardh fytyrën e vërtetë të fituesve të mëdhenj nën hijen e projekteve strategjike në fushën e industrisë ushtarake.
Emiljano Dusha, sipërmarrësi i lidhur prej vitesh me tendera të Ministrisë së Brendshme dhe me padi në SPAK për blerje votash për maxhorancën aktuale, po shfaqet tashmë si një lojtar kyç në themelin e industrisë ushtarake shqiptare, duke marrë pozicion dominues në kompanitë e krijuara rishtazi rreth shoqërisë shtetërore KAYO sh.a.
Tre kompani të reja, TIMAK DEFENCE, M.K.D dhe GUNA TACTICAL, janë regjistruar vetëm në tri ditët e para të muajit gusht 2025, të gjitha me KAYO-n si shoqëri mëmë.
Dusha kontrollon dy prej tyre (shih tabelën).
Kjo e fundit u ngrit në vitin 2024 mbi rrënojat e ish-uzinave ushtarake Gramsh, Poliçan dhe Mjekës, drejtohet nga ish-drejtori i Policisë së Shtetit Ardi Veliu, dhe ka një kapital fillestar prej 150 milionë lekësh.
Sipas të dhënave nga Open Corporates Albania të konsultuara nga Skyweb.al, skema e krijuar siguron që përmes MSSC-së së Emiljano Dushës, ai të kontrollojë një pjesë të rëndësishme të tregut të prodhimit të armëve, municioneve dhe uniformave duke u vendosur në qendër të të gjithë prodhimit në emër të shtetit shqiptar.
Një skemë e ngjashme funksionon edhe në Turqi, ku biznesmenë të lidhur ngushtë me qeverinë kanë kompanitë kryesore të prodhimit të armëve dhe pajisjeve ushtarake.
Duket se modeli është marrë pikërisht nga Turqia.
Skyweb e paralajmëroi skemën që po përgatitej duke raportuar se Dusha po pozicionohej për të hyrë fuqishëm në këtë sektor, duke shfrytëzuar lidhjet e tij me maxhorancën, lidhje të krijuara në kohën kur mblidhte vota e rrihte gazetarë në emër të saj.
Tashmë, kjo prognozë bëhet realitet: Dusha jo vetëm që mbetet i preferuar për tenderat e pajisjeve të Policisë së Shtetit, por kalon në nivel më të lartë, prodhues i drejtpërdrejtë i armëve, municioneve dhe logjistikës ushtarake të Shqipërisë me kontrata të sigurta me vulën e shtetit shqiptar.
KAYO sh.a. nga ana tjetër, mbetet nën kontroll të plotë politik përmes bordit të drejtuar nga Ardi Veliu, duke krijuar një model të ri partneriteti publik-privat ku “privati i preferuar” zgjidhet nga vetë politika.
Në thelb, projekti i armëve “Made in Albania” duket se po shndërrohet në një portofol të ri tenderash të bujshëm, ku gara reale zëvendësohet nga aksioneri i garantuar, MSSC e Emiljano Dushës. /skyweb.al
