Adi Çoba shëtiste Durrësit! BKH e kap pa njoftuar policinë…Frikë për dekonspirim?
Byroja Kombëtare e Hetimit mësohet të ketë arrestuar mbrëmjen e kësaj të mërkure një personazh kyç në trafikun e kokainës, Adi Çoba. Sipas burimeve, ai është prangosur në Durrës, në një operacion ku nuk është përfshirë Policia e Shtetit. Paraditen e sotme, kreu i SPAK Klodian Braho tha se për persona të veçantë janë duke menduar një strategji për t’i arrestuar vetë, zotim të cilin duket se e realizoi brenda pak orëve nga deklarimi publik. Vazhdimisht vitet e fundit, SPAK, në dosjet hetimore ka gjetur efektivë policie, shefa, e deri në rang drejtuesi në policinë e Shtetit që kanë qënë të përfshirë në grupe kriminale. Në disa hetime këta zyrtarë policie kanë dekonspiruar operacionet dhe madje kanë rrezikuar jetën e kolegëve të tyre duke dhënë informacion tek bandat kriminale.
Deri vitin e kaluar emri i tij rezultonte tërësisht i panjohur për drejtësinë shqiptare, por për herë të parë shfaqet në skenë pas operacionit Ura që goditi një rrjeti ndërkombëtar të trafikut të drogës. Ai mbetet një figurë misterioze, por në dosjen e drejtësisë italiane për këtë operacion, Adi Çoba shfaqet si organizatori i rrjetit të trafikut të kokainës në Itali.
Sipas hetimeve të autoriteteve italiane, Adi Çoba rezulton të jetë drejtuesi i organizatës i cili siguronte dhe dërgonte nga jashtë, sasi të mëdha heroine dhe kokaine në Itali. Ai koordinonte dhe drejtonte nga Shqipëria aktivitetet e anëtarëve të tjerë të organizatës, shqiptarë dhe italianë. Në dosjen italiane thuhet se Adi Çoba, “në cilësinë e kreut dhe promovuesit të grupit, merrte dhe dërgonte në Itali korrierë që sillnin sasi të mëdha heroine dhe kokainë, të furnizuara nga Shqipëria dhe Holanda përmes veprimtarisë së paligjshme të anëtarëve të tjerë të grupit”.
