Arratisja e Altin Ndocit, rrëfimi i policëve: Ma futi me grusht…unë rash sipër kolegut dhe u rrëzuam
Gjykata e Durrësit ka vendosur të lërë në qeli ish-zv/shefin e Policisë së Burgut të Durrësit, Dezdemon Pazaj, si dhe dy efektivët Sali Ferollari dhe Fation Baçi, të cilët shoqëruan të burgosurin Altin Ndoci drejt spitalit ditën e arratisjes.
Ndërkohë, pavarësisht se Prokuroria kërkoi masën e sigurisë “arrest në burg” për të tetë të arrestuarit, trupi gjykues vendosi masa më të lehta për tre efektivë të tjerë të grupit të shoqërimit. Aranit Çela, Preng Marvataj dhe Dorjan Saraçi u liruan nga qelia dhe ndaj tyre u caktua masa “detyrim paraqitjeje”.
Për kryeinfermierin e burgut, Aulon Çuko, si dhe për punonjësen Violeta Uka, Gjykata vendosi masën e sigurisë “arrest në shtëpi”.
Detaje nga hetimi
Sipas Prokurorisë së Durrësit, më datë 13 janar, kryeinfermieri Aulon Çuko ka hartuar një rekomandim mjekësor për katër të burgosur, mes tyre edhe Altin Ndoci, për shkak të problemeve shëndetësore të shfaqura. Megjithatë, mjekja Ylfete Sema nuk ka kryer kontroll shëndetësor për Ndocin, por bazuar vetëm në të dhënat e kryeinfermierit, ka rekomanduar konsultë me mjek kirurg në Spitalin e Durrësit.
Gjatë transportit me ambulancë dhe më pas në ambientet e spitalit, Altin Ndoci ka shfaqur ankesa të vazhdueshme për dhimbje në veshka. Për këtë arsye, grupi i shoqërimit i ka hequr prangat.
Në dosjen hetimore thuhet se në spital, Altin Ndoci është lënë nën ruajtjen e vetëm dy efektivëve, Ferollari dhe Baçi. Ai është shoqëruar katër herë në tualet, ndërsa herën e pestë, sapo u hap porta metalike, ka goditur efektivin Fation Baçi. Ky i fundit është rrëzuar mbi Sali Ferollarin, duke i lënë të dy në tokë, moment që i ka mundësuar Ndocit arratisjen.
Hetuesit dyshojnë se janë kryer shkelje serioze të procedurave të sigurisë, pasi i burgosuri është lënë pa pranga dhe është ruajtur nga vetëm dy efektivë, ndërkohë që rregullorja parashikon minimalisht tre.
Përgjegjësi edhe për drejtuesit
Sipas hetimit, drejtori i Burgut të Durrësit, Indrit Cerloj, ka miratuar urdhrin për shoqërimin e Altin Ndocit në spital në kundërshtim me ligjin, pa verifikuar vizitën mjekësore paraprake dhe pa ushtruar kontroll mbi procedurat e shoqërimit.
Për këtë ngjarje, vijojnë të mbeten të arrestuar Indrit Cerloj, i dyshuar për shpërdorim detyre, si dhe mjekja Ylfete Sema, e cila kishte rekomanduar vizitën në spital. Ata pritet të dalin të hënën para Gjykatës për t’u njohur me masat e sigurisë.