1 milion euro brenda 1 sekondi! Kush është biznesmeni shqiptar që bëri gol, por iu anulua
Tentativa për të kaluar gati 1 milion euro përmes një karte bankare të huaj dhe terminaleve POS ndezi sinjalet e alarmit te Mastercard International dhe çoi në bllokimin e menjëhershëm të transaksioneve nga banka në Shqipëri.
Rasti, i publikuar në Raportin Vjetor 2025 të Agjencisë së Inteligjencës Financiare, konsiderohet si një nga skemat më të avancuara të dyshuara për mashtrim financiar dhe pastrim parash të evidentuara gjatë vitit të kaluar.
Sipas raportit, një kompani shqiptare e regjistruar me aktivitet import-eksporti dhe tregtimi mallrash ushqimorë e industrialë kishte krijuar marrëdhënie biznesi me një bankë të nivelit të dytë në Shqipëri në dhjetor 2024. Administrator i kompanisë rezultonte një shtetas i huaj.
Vetëm pak ditë pas hapjes së llogarive, kompania vendosi në funksion dy terminale POS dhe nisi testime me një kartë të lëshuar nga një bankë belge.
Më 26 dhjetor 2024, përmes POS u kreditua një shumë prej rreth 96 mijë eurosh, ndërsa pjesa më e madhe e saj, rreth 83 mijë euro, u tërhoq menjëherë nga llogaria. Vetëm pak ditë më vonë, më 31 dhjetor, kompania kreditoi edhe 152 mijë euro të tjera dhe tentoi të realizonte një tjetër transaksion prej 790 mijë eurosh.
Sipas AIF, tentativa për të kaluar limite të larta në kartë dhe natyra e pazakontë e transaksioneve sollën ndërhyrjen e Mastercard International, e cila ngriti dyshime dhe bllokoi operacionet. Pas sinjalizimit, banka në Shqipëri bllokoi llogaritë e kompanisë dhe nisi procedurat “charge back”.
Për të justifikuar qarkullimin e shumave, kompania kishte paraqitur fatura tatimore dhe një kontratë me një subjekt në Belgjikë. Në dokumentacion pretendohej se kompania shqiptare do të ofronte shërbime eskorte, makina me qira dhe makina VIP me qira, ndërsa vlera totale e kontratës arrinte në 2.5 milionë euro.
Raporti evidenton se dyshimet u shtuan për shkak të qarkullimit të menjëhershëm të shumave të mëdha, tërheqjes së shpejtë të parave nga llogaritë, përdorimit të kartave të huaja dhe natyrës së vështirë për t’u verifikuar të shërbimeve të deklaruara.
AIF e paraqet rastin si një tregues të mënyrës se si skemat e dyshuara të pastrimit të parave po zhvendosen nga format tradicionale cash drejt pagesave elektronike, terminaleve POS dhe strukturave ndërkombëtare të transfertave financiare.