Një situatë e pazakontë është regjistruar gjatë një aksioni të Policisë në zonat malore të Krujës, ku efektivët po kryenin kontrolle për parandalimin dhe goditjen e kultivimit të kanabisit.
Strukturat e Drejtorisë Vendore të Policisë Tiranë, në bashkëpunim me Forcën Kombëtare të Sigurisë dhe Agjencinë e Mbikëqyrjes Policore, po ushtrojnë kontrolle në territorin e rrethit Krujë, në kuadër të planit të masave për kontrollin e territorit.
U del përpara arusha, polici qëllon me armë gjatë aksionit për kanabis në Krujë
Shërbimet ishin ndarë në disa grupe dhe po kontrollonin zona të ndryshme. Rreth orës 11:30, një prej punonjësve të Policisë, pjesë e një grupi kontrolli në një zonë të pyllëzuar malore të Njësisë Administrative Cudhi, është përballur me rrezikun nga kafshët e egra.
Sipas Policisë, për të larguar rrezikun, efektivi ka qëlluar në ajër me armën e shërbimit.
Në atë moment, për shkak të mungesës së valëve telefonike, grupet e tjera të kontrollit nuk kishin mundësi të komunikonin me njëri-tjetrin. Si pasojë, kur dëgjuan të shtënat, efektivët e grupeve të tjera dyshuan fillimisht se në zonë mund të ishte qëlluar nga ndonjë person.
Pas sqarimit të situatës dhe dokumentimit të rastit sipas procedurave ligjore, operacioni ka vijuar normalisht.
Gjatë kontrolleve në terren, deri në këto momente janë konstatuar dhe asgjësuar rreth 300 bimë kanabis.
Policia vijon kontrollet në zonat malore të Krujës për evidentimin dhe goditjen e rasteve të kultivimit të bimëve narkotike.
