TIRANË – Ditën e sotme, dy drejtues të kompanisë telefonike ONE Albania do të dalin para Gjykatës Penale për t’u njohur me masën e sigurisë, pasi u arrestuan në kuadër të një operacioni të gjerë antidrogë të Policisë së Tiranës, i cili çoi në pranga 22 persona, të dyshuar si pjesë e një grupi kriminal të strukturuar.
Sipas burimeve zyrtare, para gjykatës do të dalin:
- Erald Sina, Drejtues i Departamentit të Zyrave dhe Pasurisë në ONE Albania
- Artan Pullazi, Team Leader në ONE Albania
Operacioni ka shkaktuar tronditje institucionale, pasi mes të arrestuarve dhe personave nën hetim rezultojnë punonjës dhe drejtues të një prej kompanive më të mëdha të telekomunikacionit në vend.
Hetimet ndaj grupit të dyshuar kanë zgjatur rreth katër javë, gjatë të cilave policia ka kryer përgjime, ndjekje fizike dhe verifikime të shumta. Sipas burimeve pranë hetimit, dy drejtuesit dyshohet se kanë qenë të përfshirë prej kohësh në aktivitetin e shitblerjes së lëndëve narkotike, duke shfrytëzuar rrjete kontaktesh të krijuara ndër vite.
Pas përfundimit të hetimeve disa-javore, autoritetet kanë ndërmarrë goditjen finale në disa zona të Tiranës dhe rrethinat e saj. Gjatë operacionit janë kryer kontrolle në banesa dhe ambiente të ndryshme, ku disa prej të arrestuarve janë kapur në flagrancë me lëndë narkotike të llojit kokainë dhe kanabis.
Burime policore raportojnë edhe një episod të pazakontë gjatë arrestimit të njërit prej drejtuesve, i cili dyshohet se u është drejtuar efektivëve me fjalët:
“A e dini kush jam unë? S’keni shans të më arrestoni.”
Pavarësisht këtij reagimi, policia ka vijuar procedurat ligjore, duke theksuar se askush nuk është mbi ligjin. Hetimet vijojnë për zbardhjen e plotë të aktivitetit kriminal dhe për identifikimin e personave të tjerë të përfshirë.
