Kryeministri Edi Rama njoftoi dje se qeveria do të heqë taksën e qarkullimit nga karburantet, duke parashikuar uljen e çmimit të naftës dhe benzinës me rreth 32 lekë për litër. Por lehtësimi në furnizim shoqërohet me rritjen e pagesave vjetore për automjetet, përmes projektligjit “Për taksat kombëtare”, të mbërritur në Kuvend.
Taksa e Qarkullimit
Ndryshimet propozohen të zbatohen nga 1 janari 2027. Qeveria synon të kompensojë pjesërisht të ardhurat e humbura nga karburantet duke mbledhur më shumë nga taksimi i mjeteve, përfshirë makinat elektrike dhe ato të reja.
Taksa që propozohet të hiqet nga nafta dhe benzina është 27 lekë për litër. Bashkë me TVSH-në mbi të, ulja e barrës tatimore arrin në 32,4 lekë për litër. Ndryshimi përfundimtar i çmimit në karburante do të varet edhe nga ecuria e tregjeve ndërkombëtare dhe kostot e furnizimit.
Për pronarët e makinave, pagesa vjetore do të përcaktohet nga cilindrata, vjetërsia dhe lloji i karburantit. Formula ruhet, por tarifat rriten dhe koeficientët e vjetërsisë ndryshojnë, duke rënduar më shumë automjetet e vjetra dhe ato me motorë të mëdhenj.
Për autoveturat deri në 2 000 cm³, tarifa që përdoret në formulë dyfishohet: nga 12,5 në 25 lekë për naftën dhe nga 10 në 20 lekë për benzinën. Për gazin propozohet gjithashtu tarifa 20 lekë. Mbi 2 000 cm³, tarifat bëhen 26 lekë për naftën dhe 21 lekë për benzinën ose gazin.
Efekti duket te pagesat konkrete. Një autoveturë me naftë, motor 1.6 dhe vjetërsi pesëvjeçare do të paguajë 7 600 lekë në vit. Me të njëjtin motor, pagesa rritet në 9 600 lekë kur makina është dhjetëvjeçare, në 17 600 lekë kur është 15-vjeçare dhe në 25 600 lekë kur është 20-vjeçare.
Për benzinën dhe gazin, detyrimi është më i ulët. Një makinë dhjetëvjeçare me motor 1.6 do të paguajë 7 680 lekë, ndërsa një 20-vjeçare me të njëjtën cilindratë do të paguajë 20 480 lekë në vit.
Sipas formulës së propozuar, një makinë e vitit 2014, me naftë dhe motor 1.6, do të ketë një taksë prej 14 400 lekësh në vitin 2027. Për një automjet të vitit 2010, me naftë dhe cilindratë 2 200 cm³, detyrimi arrin në 29 744 lekë.
Projektligji prek edhe kategoritë që sot përjashtohen ose trajtohen ndryshe. Makinat e reja humbasin përjashtimin nga taksa në tre vitet e para, ndërsa për makinat elektrike vendoset një pagesë fikse prej 15 mijë lekësh në vit. Për motorët elektrikë propozohet detyrimi 1 mijë lekë.
Për automjetet luksoze, taksa e posaçme vjetore rritet nga 21 mijë në 40 mijë lekë. Për autobusët, tarifat e formulës bëhen 25 lekë për naftën dhe 20 lekë për benzinën ose gazin. Rimorkiot dhe gjysmërimorkiot deri në 50 tonë do të paguajnë 1 lek për kilogram, ndërsa mbi këtë peshë 60 mijë lekë në vit.
Pagesa e taksës do të mbulojë 365 ditë. Vonesa mbi dhjetë ditë pas përfundimit të afatit do të shoqërohet me gjobë. Shumat e mësipërme nuk përfshijnë siguracionin dhe kontrollin teknik, të cilat paguhen veçmas.
Ndryshon edhe shpërndarja e të ardhurave. Bashkitë do të përfitojnë vetëm 5 për qind të të ardhurave nga taksa vjetore e mjeteve, kundrejt 25 për qind aktualisht. Ulet gjithashtu pjesa që përfiton institucioni mbledhës.
Sipas Ministrisë së Financave, rritja e taksave të automjeteve do të mbulojë vetëm një pjesë të humbjes nga heqja e taksës së qarkullimit. Në total, paketa parashikohet t’i sjellë buxhetit rreth 5 miliardë lekë më pak të ardhura.
